Претходен број

Црвенковски ќе го освежува СДСМ со млади кадри

Старо-новиот лидер е пред една од најсериозните политички битки од кои зависи и неговата и иднината на СДСМ

Билјана Јовановска

И покрај тоа што експретседателот Бранко Црвенковски има само 11 слободни дена пред партискиот конгрес, кој треба да го врати на лидерското место во СДСМ, време за вистински одмор воопшто нема да има. Вчера, тој кусо се појави на „Бихаќска“ колку да испие кафе и да ја почувствува атмосферата, бидејќи изминатите пет години само еднаш или два пати бил на оваа локација. Како и да е, уште неделава сериозно ќе мора да се фати за работа.

Реално, Црвенковски е пред една од најсериозните политички битки во која за противник го има Никола Груевски и неговата ВМРО-ДПМНЕ од чиј исход ќе зависи дали искусниот политичар ќе остане во политиката или не. Но, во голема мера од тоа ќе зависи и иднината на најголемата опозициска партија. Не случајно, едни во враќањето на Црвенковски во СДСМ гледаат спас од погрешната политика на популистот Груевски, други, пак, го оспоруваат неговиот кредибилитет, забележувајќи му дека веќе е „истрошен“. Но, во секој случај, неспорно е дека Црвенковски никого не остава рамнодушен: ниту приврзаниците ниту опонентите.

Од пречекот на „Бихаќска“ се виде дека кампањата започна веќе со првото доаѓање на Црвенковски во партијата. Одамна во седиштето на СДСМ немало таква раздвиженост од сопартијци или поддржувачи, па веднаш по заминувањето на новинарските екипи, идниот лидер се спушти уште еднаш во базата. Многумина ова го оценија како добар, позитивен знак.

Во каква партија се враќа лидерот со најдолг стаж? Дали СДСМ навистина е без јасен концепт за обновување? Постои ли раскараност, па главните партиски фаци немаат којзнае каква комуникација и работите не функционираат, а фракционерството им е пред врата... Но, дали станува збор само за наменски подгреана атмосфера или реалност, во многу нешта ќе стане појасно уште на самиот изборен конгрес закажан за 24 мај.

Од тоа како ќе тече и дали Централниот одбор, како највисок партиски орган, ќе ја добие довербата на делегатите на СДСМ или партијата ќе изгласа само лидер кој нема да има легитимни соработници, практично, најмногу ќе зависи дали веќе во јуни на социјалдемократите ќе им се случи уште еден конгрес. Доколку остане сегашниот ЦО, Црвенковски ќе има стеснет простор за погенерална реконструкција на партијата, бидејќи ќе може да кооптира само 10-15 нови члена. Од друга страна, ова би била и поедноставната варијанта за партијата да не се занимава сама со себе, туку да се зафати со конкретни проблеми. Ако, пак, ЦО не добие зелено светло за 4-6 недели, ќе следува нов конгрес на кој би се избирале 70 члена во највисокото партиско тело и девет на Надзорниот одбор. Во меѓувреме, не е исклучено Централниот одбор и да се повлече, се разбира, ако не ја добие довербата.

Кој ќе биде во најтесното раководство, ама и во ЦО на СДСМ, веројатно знае само Црвенковски. Всушност, и тој е во фаза на исчекување одговори од некои нови и млади неоптоварени интелектуалци, на кој ова би им било прво пуштање во политички води, а на кој Црвенковски им понудил шанса за партиско промовирање. Калкулациите кој ќе остане а кој ќе си замине, во случајов, се неблагодарни, но неодамнешната изјава на в.д. претседателот Зоран Заев дека не се битни кадровските решенија, туку решенијата што ќе ги нуди СДСМ за надминување на проблемите навестува потемелни освежувања. За волја на вистината, во изминатиов период јавноста не дозна многу за ангажманот на Магдалена Несторовска или Љубомир Јанев, на пример, а двајцата се потпретседатели на партијата.

Неблагодарни се и прогнозите дали во врвот на СДСМ ќе има место за оние со кои Црвенковски и не бил во најдобри релации. И во минатото тој правел компромиси и носители на високи партиски функции биле и луѓе со кои не бил во некоја љубов, каков што беше, на пример, случајот со Тито Петковски. Искуството од раководењето на Црвенковски со партијата говори дека потенцијалните противници ги држел на око, во своја близина, а ги жртвувал оние кои му биле блиски. Конкретно, личните релации не му биле водилка во кадровската политика, а сега, кога од потезите кои ќе ги влече ќе зависи и неговата и иднината на СДСМ, сосема е јасно дека нема да му проработи сентименталноста, туку ќе го интересира да создаде тим кој ќе биде мотивиран и ќе сака да победи. Тоа нема да биде лесно зашто и за инаугуративниот говор на Иванов, можевме да слушнеме различни партиски реакции. Додека координаторката Цветанка Иванова обраќањето на новиот шеф на државата го оцени како празен и полн со фрази, Ѓорѓи Спасов го пофали.

Во секој случај, повеќе од сигурно е дека Црвенковски ќе мора да ја консолидира партијата, да ја дисциплинира, но не по теркот на ВМРО-ДПМНЕ, зашто кај социјалдемократите тоа не поминува.