Претходен број

Непознато каде живее Иванов, Црвенковски се врати во Капиштец

Од безбедносни причини не се открива дали претседателот се пресели на Водно

Оливера Војновска

Каде живее новиот македонски претседател Ѓорге Иванов по официјалното стапување на највисоката државна функција? Засега останува енигма дали Иванов со своето семејство, сопругата Маја и синот Иван, завчера се пресели во претседателската вила што ја користеа сите негови претходници - поранешните претседатели Киро Глигоров, Борис Трајковски и Бранко Црвенковски. Или првата вечер како шеф на државата ја помина во станот во Центар. Досегашниот претседател Црвенковски ја напушти резиденцијата на Водно и со своето семејство се врати во станот во Капиштец.

Иванов и Црвенковски завчера, пред почетокот на церемонијата, во американски стил им мавтаа на луѓето кои од паркот „Жена-борец“ им аплаудираа, а потоа секој тргна по својот пат. Иванов од вчера е во официјална посета на Брисел - прва по преземањето на функцијата, откако претходно се сретна со претставниците на верските заедници. Сепак, нема информации каде замина претседателот по официјалната церемонија и по првиот работен ден во новите простории во вилата „Анекс“ на Водно. Советниците од неговиот кабинет велат дека од „безбедносни причини не можат да кажат каде живее претседателот со семејството и додаваат дека наскоро ќе излезат во јавноста со ваква информација“.

Засега не се открива ниту дали првата дама ќе продолжи со својата професија, како што самата изјавуваше дека има таква желба во интервјуата за време на претседателските избори. Маја Иванова (45) по вокација е правник и работи како советник во Агенцијата за цивилна воздушна пловидба. Во нејзината биографија, објавена на сајтот на претседателот, пишува дека зборува течно англиски, во слободното време се занимава со свирење пијано и хармоника. Иванова сака да пишува поезија и има објавено една збирка. Моментно е непознатост дали Иванова ќе сака да го замени мебелот и да ја уреди резиденцијата по свој вкус, се разбира, доколку семејството одлучи да живее на Водно

Своевидна мистерија беше и составот на тимот на претседателот, кој се чуваше во тајност се' до самата инаугурација. Практично, со формалното преземање на претседателската функција завчера беше обелоденет и кабинетот на Иванов, и тоа преку Интернет-страницата на новиот претседател на државата.

Платата на шефот на државата е околу 1.500 евра. Со ребалансот на буџетот, претседателот годинава ќе има на располагање 56.181.000 денари, наместо претход��о предвидените 72.861.000 денари.

Новите работни простории на Црвенковски се на улицата „Огњан Прица“, во близина на зградата во која живее премиерот Никола Груевски и на седиштето на СДСМ на „Бихаќска“. Според Законот за правата на претседателот и неговото семејство, по престанување на функцијата, Црвенковски има право на пензија чиј износ е еднаков со износот на платата што ја примал. Што значи дека и тој ќе има плата од околу 1.500 евра. Законот, покрај право на канцелариски простор, му дозволува да има и најмногу тројца соработници. Црвенковски како поранешен претседател има право и на лично обезбедување, како и на користење службено возило и возач. Тој има право на материјални трошоци, а средствата се обезбедуваат од буџетот и изнесуваат осум отсто од средствата утврдени во буџетот на актуелниот шеф на државата.

Исто така, тој како претседател на кого му престанала функцијата учествува на државни свечености и манифестации, редоследно по актуелниот претседател, претседателот на Собранието, претседателот на Владата и претседателот на Уставниот суд. Сепак, на поранешниот шеф на државата може, доколку сака, по негово барање да му мируваат правата утврдени со овој закон.