Спикерот Велјановски се сели во поранешниот кабинет на Црвенковски
Спикерот Трајко Велјаноски, најверојатно, наредната недела ќе се пресели во кабинетот што го користеше довчерашниот претседател Бранко Црвенковски, а кој е познат по мебелот изработен во резба.
Со заминувањето на Црвенковски од функцијата, во собраниската зграда се ослободија 17 простории, со оглед на тоа што претседателот Ѓорге Иванов прв пат има работни простории надвор од парламентот, во вилата „Анекс“ на Водно. Дел од поранешните простории на тимот на Црвенковски ќе ги добијат пратениците, а дел собраниските служби.
Од Собранието не откриваат кој ќе се всели во сегашниот кабинет на Велјаноски, велат дека досега никој од тројцата потпретседатели на Собранието не пројавил желба за овие канцеларии. Администрацијата на претседателот се' уште е во фаза на преселување и во парламентот се надеваат дека тоа ќе заврши до крајот на неделата. Оттаму велат дека нема да има некое значајно реновирање на просториите, освен ситни поправки и варосување. Со преселувањето на кабинетот на спикерот, ќе се поместат и безбедносните врати на тој дел од зградата. (О.В.) |
