Поглед

Кој ќе ни одговори?

Тамара Грнчароска

„Би се воздржал од коментари!“ Вака вицепремиерот за европски прашања, Васко Наумовски, одговори кога му беше побаран конкретен пример за постигнат напредок во Македонија, откако 15 минути го фалеше напредок што Владата го постигнала во сите 33 поглавја за пристапување во ЕУ, од кои во две третини сме исти или подобри од лани. Неверојатно! Вицепремиерот, под чија контрола се реформите што ги правиме за членство, не сакаше или, пак, можеби не знаеше да даде конкретен пример во што сме напреднале.

„Сите коментари ги даде Европската комисија“, рече Наумовски. Добро. Но, ако е така, зошто Наумовски ни го коментираше истиот тој извештај од ЕК. Па, нели ЕК се' си кажала во него - и колку ни е зависно и нефункционално судството, колку ни е партизирана администрацијата, колку е видлив судирот на интереси кај функционерите, колку не функционира пазарот на трудот и слободното движење на стоки. Можеби се загрижи дека не сме го сфатиле толку „добро“ извештајот како што го сфати Владата? Или на Наумовски му е полесно да води демагошка расправа за тоа дали „чашата е полупразна или полуполна“, а потешко му оди кога треба да убеди да се испие горчливата и застоена течност од чашата, па останува без коментар. Уште поиронично е што никој не му побара коментар, туку конкретен пример, сличен на оној што го даде за нашето патување кон Брисел - Македонија во 2009 година стигнала до Будимпешта, а во 2010 до Виена. Можеше, на пример, да ни каже, од лани невработеноста е намалена за толку проценти или спасивме толку реки од загадување или ја запревме етничката сегрегација во училиштата. По се' изгледа, за такви работи во Македонија се останува без коментар.

Но, ако Наумовски остана без коментар, тоа не значи дека прашањето е одговорено. Напротив.