Рома, Челзи и Панатинаикос ги пополнија последните три места
Римјаните со победата над Бордо први во групата А, пред Челзи, а хитот Анортозис остана без Европа
Рома, Челзи и Панатинаикос се трите екипи кои ги пополнија преостанатите три места за осминафиналето од Лигата на шампионите.
Рома повторно беше поуспешна во директниот дуел на „Олимпико“ со Бордо 2:0, осигурувајќи го првото место во групата А, пред моќниот Челзи, кој ќе мора да се задоволи со втората позиција и лошата ждрепка во продолжение од натпреварувањето.
Рома одигра одлично, посебно во вториот дел, а јунаци на натпреварот беа Бриги и Тоти, стрелците на головите, кои паднаа во последниот половина час игра. Бордо исто така имаше свои шанси, но не успеа да ги реализира, па сега му преостанува да се задоволи со трансферот во Купот на УЕФА.
„Во ниту еден момент не се посомневав дека оваа екипа ќе се врати во ритам. Станува збор за интелигентен и квалитетен тим. Да се победи со ваков резултат во момент кога ти е доволен и бод покажува дека тимот ја има неопходната хемија“, изјави тренерот на Рома Спалети.
Неговиот колега од спротивната страна Лорен Блан смета дека неговиот тим можел подобро да помине: „Рома одигра типично италијански. Ќе те остави да ја имаш контролата врз играта, а потоа ќе те казни. Бевме наивни“, посочи Блан.
Сколариевиот Челзи не во добра форма, а за тоа сведочи и тешката победа над романскиот Клуж. Трупите на Абрамовиќ поведоа со голот на Калу во 40 минута, но Романците израмнија со погодокот на Коне. Сепак, Дрогба во 71 минута му донесе на Челзи победа, но играта нема долго да остане во сеќавањата на навивачите.
Апсолутниот хит сезонава кипарскиот Анартозис се прости од европските натпреварувања. Иако, играше феноменално цела сезона поразот од Панатинаикос скапо го чинеше. Остана Анортозис и без Купот на УЕФА поради победата на Вердер над Интер. Така грчкиот Панатинаикос заврши како прв во групата Б пред Интер.
Резултати
Група А: Челзи - Клуж 2:1, Рома - Бордо 2:0
Табела: Рома 12, Челзи 11, Бордо 7, Клуж 4
Група Б: Панатинаикос - Анортозис 1:0, Вердер - Интер 2:1
Табела: Панатинаикос 10, Интер 8, Вердер 7, Анортозис 6
Група Ц: Барселона - Шахтјор 2:3
Табела: Барселона 13, Спортинг 12, Шахтјор 9, Базел 1
Група Д: Марсеј - Атлетико 0:0, ПСВ - Ливерпул 1:3
Табела: Ливерпул 14, Атлетико 12, Марсеј 4, ПСВ 3 |
