Претходен број

Вардарци му порачуваат на Трифун Костовски да се врати

МВР се' уште работи на утврдување на лицата кои учествуваа во инцидентот на преслапот Стража

Сашко Ѓ. Димовски

Ден по одлуката на семејството Костовски да го напушти Вардар, фудбалерите на нашиот најтрофеен клуб упатија заеднички апел до спонзорот да го промени својот став и да се врати во „црвено-црните“ структури.

„Не е спорно дека екипата е во резултатска криза во ситуација кога клубот функционира беспрекорно на организациски и финансиски план. Во неколку натпревари се загубени бодови со примени голови во последните минути. Ние како фудбалери ја прифаќаме одговорноста за слабите резултати, но тоа треба да биде предмет на расправа во преодниот рок и во рамките на клубот“, се вели во почетоток на соопштението на вардаровите првотимци до средствата за јавно информирање.

„Не е добро за македонскиот фудбал и спорт воопшто да замине финансиер кој коректно и во целост ги исполнува своите финансиски обврски кон клубот и играчите, кој се има докажано и во Европа на спортски план. Затоа упатуваме заеднички апел до фамилијата Костовски да ја промени својата одлука и да остане во Вардар во овие тешки моменти за клубот. Зад спонзорот стојат сите вистински симпатизери на клубот и спортската јавност во Македонија која знае да препознае искрени заложби за создавање модерен фудбалски колектив“, се вели на крајот од дописот на „црвено-црните“.

Како претставник на првиот тим на Вардар, Мирослав Вајс, изрази поддршка за семејството Костовски и апелира да се врати во клубот.

Ниту претставници на клубот ниту пак фудбалерите не сакаа да говорат за идентитетот на сторителите на немилиот настан на преслапот Стража. Ја осудија постапката на дел од навивачката група „Комити“, но велат дека решавањето на случајот не е нивна обврска туку тоа е работа на припадниците на Министреството за внатрешни работи (МВР). Оттаму пак порачуваат дека се преземени сите мерки за утврдување на лицата кои учествуваа во инцидентот.

Со соопштение, вчера, се огласија и вработените во Вардар. И тие побараа промена на одлуката на семејството Костовски и негово враќање во клубот.

„Од вашето преземање на раководењето со Вардар сведоци сме на едно крајно професионално организирање на работењето и поставување на работните обврски во насока на успешно функционирање на клубот. Затоа, најискрено Ве молиме да се вратите и со заеднички сили да ги надминеме последните негативни случувања и заедно да продолжиме по патот кон успех кој веќе почнавме да го градиме“, е пораката на вработените во Вардар до семејството Костовски.