Почина Дражен Јерковиќ
Во загрепската болница „Ребро“ во 72. година почина Дражен Јерковиќ, некогашен фудбалер на Динамо и член на репрезентацијата на Југославија која на Светското првенство во Чиле го освои 4. место. Јерковиќ имаше подолго време проблеми со срцето кои кулминираа минатата недела. За време на рутинската контрола на кардиоваскуларниот систем е констатиран прекин на циркулацијата на крвта во левата нога поради што му беше ампутирана потколеницата. Постоперативната рехабилитација течела без проблеми до моментот кога добил висока температура која, и покрај големиот труд на лекарите, не се спуштала.
Дражен Јерковиќ беше роден на 6 август 1936 година во Шибеник. Во периодот од 1954 до 1965 година за Динамо одигра 315 натпревари и постигна 300 гола! Врвот на кариерата го достигна на Светското првенство во Чиле во 1962 година на кое репрезентацијата на Југославија го освои 4. место, а тој со 4 гола ја подели титулата најдобар стрелец на шампионатот со Гаринчо, Вава, Леонел Санчез, Флоријан Алберт и Валентин Иванов.
Беше прв селектор на хрватската репрезентација и со неа оствари три победи, против САД (2:1), Романија (2:0) и Словенија (1:0). |
