Почнува продажбата на „ауди A1“

Најмалиот претставник од Инглштад, „ауди А1“ е одговор на предизвикот што го постави со „мини“ баварскиот БМВ

Владимир Ристовиќ

Долгонајавуваниот модел на „ауди A1“ веќе е достапен во дилерските центри во Германија. Испораките, наскоро, ќе бидат можни и во Австрија, Белгија, Луксембург и во Швајцарија, а останатиот дел од Европа ќе ги добие првите порачки кон средината на септември. Со почетна цена од 16,770 евра ќе може да се нарача и во „Порше“ Скопје, дилерскиот центар на „ауди“ во Македонија. Новото „ауди“ нуди голем избор на елементи што го прават возилото уникатно, а доказ за тоа е можноста за нарачка на повеќе од 800 различни верзии на надворешноста. Се очекува вкупно 50.000 возила да ја напуштат производната линија во Брисел до крајот на 2010 година, а годишното производство од планираните 100.000 единици, поради огромниот интерес за напредниот и иновативен градски убавец, е зголемено за 20%.

Инаку, „ауди A1“ ќе биде достапен во три изведби на моторот: 1.2 ТФСИ, 1.4 ТФСИ и 1.6 ТДИ. Сите мотори имаат директно вшприцување на горивото, турбополнење и старт-стоп систем за зачувување на енергијата. А1 е единственото возило во сегментот што има старт-стоп систем со автоматски пренос на брзините.

Дури и пред светската премиера, А1 предизвика голем интерес со повеќе од 150.000 клиенти, кои се регистрирале за добивање информации за лансирањето на А1 и продажните кампањи. Ауди, исто така, ја доби наградата „Ре�� дот авард“ за директниот маркетинг што беше употребен за претставувањето на А1.