ДНК гости на „Конект“ во „Колосеум“

По завршувањето на летната турнеја низ Македонија, РиБ дуото ДНК продолжува со концертната промоција на новиот албум „Кажано е се'“, кој беше издаден во јуни годинава, а неодамна доби и ексклузивно пакување. Панчо и Андреј ќе бидат специјални гости на концертот на најпопуларниот хип-хоп состав од Хрватска - „Конект“, во рамките на Фестивалот на независноста, кој ќе се одржи денеска и утре во летниот клуб „Колосеум“.

На сцената на клубот ДНК ќе настапат утревечер и ќе изведат неколку песни од новиот албум, меѓу кои „Џамп“, „Пука“, „Кажано е се'“, „Пази се од мене“, „Спонзоруша“, а заедно со „Конект“ ќе го изведат и заедничкиот хит од минатото лето „Змеј“, за кој снимија и видеозапис. Настапот на ДНК в среда во „Колосеум“ ќе биде последен нивни настап во Скопје пред големиот концерт што го подготвуваат за крајот на оваа година.