Дванаесет убиени во напад на шиитска џамија во Ирак
БАГДАД – Напаѓач-самоубиец уби 12 лица и повреди најмалку 20 во напад врз шиитска џамија за време на вчерашните петочни молитви, јави ирачката полиција. Според информациите, нападот се случил во градот Мусајиб, 80 километри јужно од главниот град Багдад.
Нападот се случи еден ден откако ирачкиот парламент го поддржа договорот со кој се регулира идното присуство на американските војници.
Околу 9.000 луѓе протестираа во багдадскиот кварт попознат како Садр сити, по петочните молитви, палејќи американски знамиња и носејќи плакати со порака: „Не, не за договорот“. Околу 2.500 лица протестираа во Басра.
Според договорот американските војници ќе ги напуштат ирачките улици до средината на 2009 година, а целосно ќе се повлечат од Ирак до крајот на 2011 година. На безбедносниот договор силно се спротивставија приврзаниците на шиитскиот свештеник Моктада ал-Садр кој наводно прогласил тридневна жалост по гласањето. (Би-Би-Си) |
