Задоволен што нема покани за Украина и за Грузија во НАТО
Хавана- Рускиот претседател Дмитриј Медведев, кој се наоѓа во посета на Куба, изрази задоволство дека САД се откажале да им предложат план на Украина и на Грузија за дејствување за членство во НАТО.
- Не знам на што се должи ваквата одлука, но јас сум задоволен дека надвладеа разумот, за жал на крајот на мандатот на се' уште актуелната американска администрација, изјави Медведев.
Тој истакна дека Русија ќе ја развива соработката со Латинска Америка, но тоа нема да биде на штета на меѓународната безбедност.
Медведев нагласи дека е задоволен од развојот на односите со Куба, сметајќи дека во последните шест месеци тие станале многу поинтензивни. Тој се наоѓа во Куба на последната станица од турнејата низ Латинска Америка која имаше за цел да го зајакне руското влијание во регионот. Медведев и кубанскиот претседател Раул Кастро се очекуваше да потпишат договори за истражување на нафта и од областа на рударството. Рускиот претседател пристигна во Хавана од Венецуела каде што тој и претседателот Хуго Чавез постигнаа договор за унапредување на нуклеарната енергија за цивилна употреба. (Би-Би-Си) |
