Русија ја обвини ЕУ за дволичност
МОСКВА - Русија ја обвини ЕУ дека потпишала договор со Грузија за распоредување мировни посматрачи, што е во спротивност со договорот постигнат неколку часа претходно со Москва. Министерот за надворешни работи на Русија изјави дека со тоа не се дозволува присуство на монитори на ЕУ во Јужна Осетија или во Абхазија, но договорот потпишан меѓу ЕУ и Грузија го дозволува тоа. Отцепените региони на Грузија се признати од Русија како независни. Европската унија соопшти дека не дискутирала со Москва дали посматрачите би можеле да ги посетат сепаратистичките отцепени региони. Комесарот на ЕУ за надворешна политика, Хавиер Солана, изрази надеж дека мониторите на ЕУ, конечно, ќе бидат распоредени во кој било дел од грузиската територија.
Русија во понеделникот се согласи да ги повлече единиците од самопрогласените тампон-зони околу Абхазија и Јужна Осетија. Тие зазедоа позиции по неодамнешниот конфликт со Грузија. Рускиот претседател Дмитриј Медведев даде ветување под услов да бидат распоредени најмалку 200 посматрачи на ЕУ за да се осигура безбедноста на двата отцепени региона. Според договорот, Русија би се повлекла од територијата на Грузија во рок од десет дена од распоредувањето на мониторите на ЕУ. Меѓутоа, министерот за надворешни работи, Сергеј Лавров, рече дека ЕУ е „подготвена да распореди монитори на целата територија на Грузија“. Тој додаде дека таков чекор е контрадикторен на договорот потпишан од Медведев, според кој е јасно ставено до знаење дека мониторите на ЕУ ќе оперираат само надвор од Јужна Осетија и Абхазија. (Би-Би-Си)
|
