Владини нафтени „инкасанти“ фатени во сексуален скандал
Министерството е одговорно за собирање милијарди долари годишно од фирми кои дупчат нафта на американска територија
ВАШИНГТОН - Официјални претставници на американската влада одговорни за собирање приходи од нафтените компании се обвинети дека биле инволвирани во култура на „етичко пропаѓање“. Според истрагата на Министерството за внатрешни работи, некои од вработените прифатиле подароци и имале сексуални односи со работници кои ги надгледувале. Други се обвинети дека лажирале договори и работеле како приватни консултанти. Министерството е одговорно за собирање милијарди долари годишно од фирми кои дупчат нафта на американска територија. Некои од највисоките претставници, кои се обвинети за лошо однесување, веќе се пензионирани или поднеле оставки. Нафтените компании наведени во извештајот се корпорацијата „Шеврон“, „Шел оил“, корпорацијата „Хес“ и корпорацијата „Гери Вилијамс енерџи“.
Двегодишната истрага на главниот инспектор на Министерството за внатрешни работи, Ерл Девејни, укажа на „култура на суштинско злоупотребување и промискуитет“ на мала група поединци, „на кои целосно им недостига прифаќање или почитување на владините етички стандарди“. „Сексуалните односи со забранети извори не може, по дефиниција, да бидат на дистанца“, истакна Девејни во извештајот. Наводните непристојни настани се случиле меѓу 2002 и 2006 година, и биле инволвирани 19 поранешни и актуелни вработени во канцелариите во Денвер и Вашингтон од Службата за управување со минерали при Министерството. (Би-Би-Си) |
