Украинците се плашат од распаѓање на земјата
МОСКВА - Околу 40 отсто од граѓаните на Украина се плашат од раскол во земјата, а дури 76 отсто се плашат дека би можело да дојде до голема економска криза. Тие загрижувачки резултати од најновото истражување што го спроведе Киевскиот меѓународен социолошки институт - од 1 д 8 септември - покажуваат каква атмосфера во државата создаде жестокиот судир без крај меѓу претседателот Виктор Јушченко и премиерката Јулија Тимошенко.
На сите испитаници им беше поставено прашањето: кои се трите најголеми опасности за Украина? Покрај веќе двата споменати одговора, 25 отсто од анкетираните Украинци се плашат од губење на суверенитетот од страна на Запад. На ранг-листата на стравови на четврто место е целосна концентрација на власта во рацете на една политичка сила, потоа импичмент на претседателот, па дури потоа опасноста од Русија. Четириесет отсто Украинци сметаат дека претседателот Јушченко го одредува курсот по кој се движи Украина.
Судирот меѓу Јушченко и Тимошенко се' повеќе добива карактеристики на голема шоу-програма која едните ги забавува, а другите ги плаши. Никаде на светот не постои премиер на власт кого претседателот го обвинува дека е државен непријател.
Вчера Јулија Тимошенко точно во 10 часот пристигна во Државното обвинителство каде што разговараше со иследниците за труењето на Виктор Јушченко пред четири години.
„Ако претседателот сака, секое утро пред работа можам да доаѓам во обвинителството. Кога човекот кого претседателот на државата го смета за конкурент на изборите го обвинуваат за национално предавство, шпионажа во полза на Кремљ, а сега и за труењето на Јушченко, тоа веќе не може да се коментира“, рече Јулија Тимошенко. Ова е втор пат да ја повикуваат Тимошенко на разговор околу труењето на Виктор Јушченко, иако таа е најзаслужна за победата на Портокаловата револуција и доаѓањето на Јушченко на претседателска функција. (Б.В.)
|
