Поглед

„Бумеранг“ по своја глава

Љубиша Станковиќ

Премиерот Никола Груевски, инаку познат по своето доцнење, со изјавата што во саботата ја даде во скопската Зоолошка градина избрза два дена! Груевски, веројатно во намера да ја пофали ефикасната работа на МВР, меѓу останатите полициски акции ја спомна и онаа со оперативно име „Бумеранг“, но премиерот не знаел дека таа ќе му се удри од глава, со оглед на тоа што случајот заврши со казни доволни за да се покрие „работењето“ на полицијата.

Доволни се прстите на двете раце за да се пресмета колку време мина од реализацијата на акцијата „Бумеранг“, па да се сфати колку време обвинетите полицајци минале во куќен притвор или во истражен затвор. Дали и овие казни ќе о(п)станат ќе почекаме да дознаеме, но она што ќе остане забележано е конвојот од полициски возила и специјалците во нив и превезувањето на полицајците од преминот Табановце до скопскиот суд. Многу театар за поткуп од само неколку евра!

Како и да е, вистинското прашање е дали тука почнуваат и завршуваат корупцијата и организираниот криминал? За премиерот Груевски овој и ваков „Бумеранг“ е случај, како што самиот рече, што „ќе влезе во нашите учебници по криминологија, но можеби и на другите факултети“.

Зар премиерот навистина смета дека со „Бумеранг“ ја спречил корупцијата и дека сега ова треба да се изучува и на факултетите? Нему и на министерката Јанкулоска им се случи и „Змиско око“, но поука од случајот изгледа нема? Затоа е за верување дека следното големо апсење најверојатно ќе добие оперативно име „Картун нетворк“, ако ништо друго само за да личи на цртан филм.

Конечно, изјавата на премиерот Груевски беше дадена во Зоолошката градина во Скопје, па како таква и нека остане запаметена.