Груевски ја чека дозволата од Грција

Премиерот веќе се чувствува како политички победник во случајот околу летот на авионот

Тамара Грнчароска

Грција се' уште тактизира со дозволата за прелетување за владиниот авион со кој премиерот Никола Груевски би требало да патува на конференцијата на „Економист“ во Атина. И вчера попладне, два дена пред стартот на конференцијата, официјална Атина молчеше за тоа дали ќе дозволи слетување на авион со ознака МКД на грчка територија.

На молкот од Атина со молк одговори и нашата Влада, од каде што вчера информираа дека се' уште не е донесена одлука за учество на премиерот на конференцијата, но оти одлуката ќе биде донесена во текот на вчерашниот ден. Сепак, според неофицијални информации, на говорот на Груевски за конференцијата на „Економист“ се работело веќе неколку денови, а тој не го откажал ниту учеството кај организаторите.

Без оглед на одлуката на Атина, Груевски верува дека од оваа „битка“ во секој случај ќе излезе како победник. Доколку не се дозволи прелетување, новата грчка влада на Јоргос Папандреу ќе биде поригидна од претходната на Константин Караманлис, кој веќе дозволи да слета владиниот авион со спорните ознаки МКД, но за конференцијата на ОБСЕ на Крф.

Доколку Грција, пак, направи пресметана отстапка со давањето дозвола, Груевски верува дека повторно ќе биде во позиција на добитник, бидејќи владиниот авион со ознаката МКД слетал во Атина.

И додека трае тактизирањето околу прелетувањето, алтернативниот министер за надворешни работи на Грција, Димитрис Друцас, изјави дека Грција продолжува да водиме отворена, но агресивна дипломатија околу спорот за името. „Отворено ги кажуваме нашите барања. Се придржуваме до црвената линија што ја развиваме заедно со мнозинството политички сили во државата“, изјави Друцас. Според него, грчките аргументи се логични, разбирливи и наидуваат на поддршка што ја има изменето играта, но недоволно за да се најде решение. Друцас смета дека за наоѓање решение е потребен соговорник, а Груевски се' уште нема покажано волја за преговарање.

Осврнувајќи се на претстојното претседавање на Македонија со Советот на Европа, тој обвинува дека „ФИРОМ стапнува на лизгав терен, сакајќи да ја злоупотреби оваа позиција за да ги протурка своите ставови“. „Но, такви дела и ставови се сигнал за незрелост на една држава што сака да се приклучи кон ЕУ“, вели Друцас.

„Нашата позиција е добро позната, едно име со географска одредница за севкупна употреба. Ова е јасна и искрена позиција. ’Северна Македонија’ е дел од предлозите на медијаторот Метју Нимиц и јасно е дека се совпаѓа со рамката за името што ја наведов“, вели Друцас, потенцирајќи дека тоа е став на Грција и на мнозинството грчки политички партии.

Интервјуто на Друцас за ставот на Грција доаѓа еден ден по изјавата на Груевски дека ќе организира референдум доколку дојде предлог „Република Северна Македонија“ за севкупна употреба од страна на Нимиц. Ваквата јавна најава од Груевски, но и од грчката страна за позициите на Атина, според европретставникот Ерван Фуере се контрапродуктивни. „Со јавни изјави од двете страни ова прашање нема да се реши и тоа може само да доведе до недоразбирања. Според мене, потребно е двете страни итно да седнат и да преговараат, за да најдат решение“, смета Фуере. Според него, изјавата на Груевски за „Северна Македонија“ само ја нагласува итноста за билатерални разговори меѓу Македонија и Грција за наоѓање решение. „Мислам дека зборувањето за референдум сега е прерано, бидејќи се' уште не сме во фаза на финални преговори за конечно решение“, смета Фуере.