Ерван Фуере распали по Владата

Тамара Грнчароска

Евроамбасадорот Ерван Фуере вчера ги предупреди Владата и владејачката партија да не го поткопуваат напредокот што го направи земјата кон ЕУ минатата година. Без ракавици и без скриени пораки, тој изјави дека „Владата и владејачката партија треба да се потсетат на одговорностите што ги имаат како земја-кандидат и да се воздржат од какви и да е активности што го поткопуваат напредокот направен минатата година“.

Како потврда на тоа, тој наведе неколку закони кои не ги рефлектираат стандардите на ЕУ, како тој за недискриминација во кој Владата не ја вклучи сексуалната ориентација на која инсистира Брисел, како и законот за водите, чие усвојување е одложено на неопределено време. Тие, според Фуере, ќе бидат негативни точки во годинешниот извештај за земјава. „За жал, последните неколку закони ја оддалечија земјата од ЕУ“, оцени тој.

„Владата треба да внимава многу повеќе на ЕУ-агендата“, предупреди амбасадорот. За него спорни и загрижувачки се и именувањата во независните тела кои се повеќе политички мотивирани отколку од објективни критериуми, како неодамнешното именување во Судскиот совет.

Фуере, кој изминативе недели не беше во земјава, со вчерашната изјава и заѕвони на власта дека „големиот одмор“ заврши и дека потезите и чекорите што ги ги прави почнуваат да ја иритираат ЕУ, особено по позитивната препорака за

Македонија од Европската комисија во ноември. „За жал, тоа што го видовме последниве месеци покажува дека оваа препорака е поткопана од неколкуте одлуки што беа донесени“, рече Фуере, апелирајќи да се направат обиди и да биде осигурано сите закони кои треба да се донесат и нивната имплементација, да бидат такви што ќе и' овозможат на Комисијата да ги рефлектира позитивните оцени во извештајот во ноември.

„Како што знаете, извештајот веќе се пишува“, нагласи евроамбасадорот. Но, освен неследењето на европската агенда, Фуере ја обвини Владата и за неработење. „Има тенденција откако е добиена препораката, да се седи и да се чека“, констатира Фуере.

За евроамбасадорот дискутабилна е и реформата во јавната администрација која, според него, се' уште е во почеток. Тој, иако позитивно ја оцени јавната дебата организирани од Владата за извештајот од експертот од Словенија, сепак, додаде дека е важно да се имплементира тој извештај. „Не е работата само во тоа да се одржи состанок што ќе ја реформира администрацијата, која сега е политизирана“, рече Фуере, според кого неуспехот да се создаде професионална администрација ќе ги поткопа перформансите на земјата кога се зборува за реформите.

Додека Фуере критикуваше и ��редупредуваше дека Владата и владејачката партија не ги слушаат советите од ЕУ, вчера пред Националниот совет за евроинтеграции вицепремиерот за европски прашања, Васко Наумовски, раскажа сосема поинаква приказна.

Презентирајќи го извештајот за првиот квартал од оваа година за исполнување на Националната програма за усвојување на европското законодавство, Наумовски се пофали дека досега не е забележан ваков напредок во овој процес, како во изминативе три месеци. Наумовски, кој по отсуство од неколку седници вчера го удостои НСЕ со свое присуство, во презентацијата на постигнатото наведе бројка од 33 усвоени закони, 10 во собраниска процедура и уште 15 кои се во владина процедура, од вкупно 106 предвидени за донесување во 2010 година. „Темпото кое беше наметнато во почетокот на годинава ќе доведе до успешно имплементирање на Националната програма до крајот на 2010 година“, рече Наумовски.

Во отсуство на повеќе претставници од опозиционите партии, седницата на Советот помина во најконструктивна атмосфера досега, со ред пофални зборови за сработеното од Владата на патот на евроинтеграциите. Честа на опозицијата вчера во НСЕ ја бранеше само Тито Петковски од НСДП, кој упати неколку критики за сработеното, порачувајќи да не се создава идилична слика за усвоените закони.

„Не е целта само да се усвојат, туку да го оживотвориме она што сме го зеле како обврска. Тука паѓаме на испит“, рече Петковски.

Наместо Наумовски, во одбрана на Владата застана пратеникот од ВМРО-ДПМНЕ, Петар Поп Арсов, претседател на собраниската Комисија за европски прашања, кој за законот за антидискриминација рече дека сексуалната ориентација е опфатена во Законот за работни односи и индиректно во Законот за државни службеници.