Мајски саем на книгата во „Феникс“
Издавачката куќа „Феникс” во новоотворениот Клуб на книгата кај Универзална сала од 14 до 24 мај организира Саем на детски книги. Саемот ќе се одржува од 8 до 20 часот во сите работни денови, а ќе можат да се набават лектири, прирачници, детски книги, боенки, сликовници и други изданија по саемски цени со попуст од 30 до 80 проценти.
Во рамките на Саемот на детски книги ќе биде промовирано второто издание на книгата „На умните не им требаат скали за качување“ од Христо Петрески, добитник на наградата „Ванчо Николески“ за најдобра детска книга, а ќе бидат промовирани и популарното издание „Книга за секое девојче“ и енциклопедијата „Научници кои го променија светот“.
На Саемот на детски книги ќе се изврши презентација и на Меѓународниот фестивал на детето од Шибеник, а гости на Саемот ќе бидат хрватскиот писател Томислав Маријан Билосниќ и бугарската поетеса Ката Ерменкова. (Н.П.) |
