Во продажба влезниците за концертот на Пети Смит
Легендарниот гитарист Том Верлејн ќе ја придружува Смит на концертот во Скопје
Од денеска во музичките продавници „Југотон“ и „Чув де Чув“, како и на билетарницата на Универзална сала, можат да се набават влезниците за концертот на њујоршката икона Пети Смит, што ќе се одржи на 10 јули во Скопје во рамките на „Оф фест“. Цените на влезниците се движат од 800 до 1.200 денари, во зависност од тоа во кој период ќе бидат купени. Од 12 до 31 мај ќе чинат 800 денари, од 1 до 30 јуни цената е 1.000 денари, додека од 1 до 10 јули ќе изнесува 1.200 денари.
Инаку, најсвежата информација поврзана со овој настан е тоа што како специјален гостин на концертот на Пети Смит во Скопје е најавен легендарниот гитарист Том Верлејн, фронтмен на некогашната култна њујоршка група „Телевижн“. Том Верлејн и Пети Смит се стари пријатели. Нивната соработка датира уште од времето на експлозијата на њу-вејв и панк-движењето кон средината на 70-тите години. Оттаму, воопшто не изненадува фактот дека Верлејн ја прифатил поканата на Смит да ја придружува, заедно со нејзиниот бенд, на сите јулски датуми што се дел од летната турнеја на Пети Смит.
Концертот на Пети Смит во Скопје претставува вонреден, дополнителен настан и големо финале на годинашново, осмо издание на „Оф фест“. (Т.И.) |
