Прешево

Уапсен Македонец за шверц на злато

21.01.2011, 10:49

Македонски државјанин од албанска националност вчера на граничниот премин Прешево се обидел нелегално да пренесе 24 килограми злато, соопштуваат од Управата на српската царина.

Лицето со иницијали А.Е го пренесувал златото во автомобил со македонски регистарски таблички, а во соопштението се наведува дека станува збор за најголемата запленета количина на злато во последните пет години.

Станува збор за околу 13 килограми во златни прачки и 10 ипол килограми златен накит и кршено злато, чија вредност е проценета на околу 300 илјади евра.

Државјанинот на Македонија со иницијали А.Е. им е предаден на истражните органи.