Револт од Интернетот на „Телекабел“

Од компанијата објаснуваат - дефекти има, но се решаваат тековно

Миркица Поповиќ


Проблеми со Интернет-врската и ненадејни исклучувања, метеж на наплатните пунктови и често недостапна техничка служба се реалноста со која се соочуваат поголемиот број граѓани, претплатници на кабелскиот оператор „Телекабел“.

„Интернетот е невозможен последнава недела. Мојата работа ми налага постојано да имам пристап до Интернет. Викендот воопшто немаше врска, а телефонот на техничката служба беше зафатен постојано. Кога ги добивме, конечно, ни рекоа дека имале технички проблеми и ќе работат на постепено решавање на проблемот. Но, утринава повторно немав Интернет“, револтирано изјави една девојка од скопската населба Козле. Корисниците често се жалат дека кога има мали временски неприлики, како што е дожд, на пример, врската ослабнува, а се случува и да снемаат Интернет и телевизиски канали.

Зоран Илиев, менаџер на „Телекабел“, ни изјави дека викендот поради проблеми со рутерот, Интернетот бил недостапен за корисниците, но дефектот бил решен и се очекува Интернет-конекцијата да е вратена во нормала. Тој додаде дека службите на кабелскиот оператор постојано работат на подобрување на врската, а најголемите проблеми се забележуваат во реонот на општината Аеродром, каде што мрежата е најстара.

Граѓаните сепак, бараат подобра услуга.

„Кабелскиот Интернет беше спас поради ниските цени кога Интернетот од другите оператори беше поскап. Меѓутоа, врската на периоди е нестабилна, без најава не исклучуваат, а потоа треба да чекаме со часови повторно да ни ја вклучат конекцијата“, ни се пожали една граѓанка од населбата Аеродром. Таа вели дека само еден вработен на едниот наплатен пункт во Аеродром не е доволен за да се справи и со корисниците што се дојдени да платат сметки, но и со оние на кои им требаат одредени информации.

„Вработените често се нервозни и нељубезни, бидејќи треба да се справат со голем број луѓе. Тоа е еден аспект на лоша грижа за корисниците. Тежок пристап до техничките служби и ненајавените прекини на програмата и Интернетот се друг аспект“, додава таа.

Во врска со овој проблем, Илиев рече дека од скоро е сменета политиката на „Телекабел“, со што корисниците сега може да ги плаќаат сметките во сите пунктови, независно од населбата во која живеат. „Сметавме дека со ова ќе се растоварат турканиците на наплатните пунктови“, изјави тој. Од „Телекабел“ велат дека неодамна вработиле и нови лица за работа во наплатните пунктови и техничките служби и дека ќе работат на зголемување на бројот на шалтерите во наплатните пунктови со цел подобро да ги услужат граѓаните.

По барањето на граѓаните да се достават опомени пред исклучување на Интернетот, Илиев рече дека не можат секогаш да се потпрат на поштата, а јавувањата на телефон биле прескапи и не се ефективни секогаш, бидејќи не можат секогаш да се добијат претплатниците. На идејата да го прават тоа по и-мејл, тој одговори оти граѓаните воопшто не ги користат мејловите што им ги даваат од „Телекабел“ при склучувањето на договорот, но дека ќе размислат за таквата опција.