Ќе понуди квалитет, но не и пониски цени

Австриската осигурителна група "Виена иншуренс" објави ребрендирање, со што на македонскиот пазар ќе се бори со поквалитетна и побрза услуга, поголем избор на полиси, нови начини на исполнување на обврските по основ на осигурување, но засега не најавуваат и пониски цени. "Винер осигурување" е ново име на осигурителната компанија "Сигма", која од јуни ја презеде осигурителната групација "Виена". На вчерашната промоција претседателот на Управниот одбор на "Винер осигурување" Македонија, Зоран Нарашанов, истакна дека ребрендирањето не значи само промена на бојата и името, туку и менување и подобрување на стандардите што недостасуваат во осигурителниот бизнис. Еден од најважните аргументи, според претседателот на Надзорниот одбор на "Винер осигурување", Ханс Раумауф, е тоа што компанијата е капитално обезбедена и затоа ќе се насочи кон инвестирање и едукација на вработените. Тој верува во успех и смета оти и во Македонија просечната премија по жител ќе го достигне нивото од Европа. "Во Македонија просечната премија по жител изнесува 75 долари, во старите членки на ЕУ таа е 3.700 евра, а во Хрватска просечната премија по жител изнесува 400 долари", рече Раумауф. Оваа австриска осигурителна групација работи веќе 180 години, а е присутна во 23 земји. (С.М.)