Нов вид бактерија гонореја отпорна на антибиотици
11.07.2011, 14:15
Шведските научници открија нов вид на бактеријата гонореја, отпорен на третманот со антибиотици. Екипата експерти, водени од Магнус Унемом, откритието го презентира на 19. Меѓународна конференција за сексуално преносливи болести во Квебек, што ќе се одржува до 13 јули. Според нивните сознанија новиот вид од таа бактерија не може да се победи со вообичаените лекови, со кои од четириесеттите години од минатиот век се третира таа полова болест.
Бактериската инфекција позната и како "трипер" досега се лекуваше со антибиотици, а доколку не биде излекувана може да доведе до неплодност кај жените или до уринарни инфекции и проблеми при мокрењето кај двата пола.
Повеќе од 700.000 луѓе во САД годишно се заразуваат од гонореја. Најзагрозена група луѓе се тие што често ги менуваат партнерите и не користат кондоми. Засега за лекување на "триперот" се користеа антибиотици на база на пеницилин, а на пациентите алергични на пеницилин им се препишуваше цефиксин или цефалоспирин.
|
