Осуммина загинати во сообраќајка во Грција
11.07.2011, 13:49
Осум лица го загубија животот, а четворица се тешко повредени во сообраќајна несреќа што се случи вчераутро на патот Александруполи -Комотини во Грција. Меѓу загинатите има две малолетни девојчиња, а еден од четворицата сериозно повредени е момче на возраст од пет години. До ужасната несреќа дошло откако комбето "ауди" во кое се наоѓале дванаесеттемина излетало од патот, удрило во банкината, потоа во бетонски столб на еден билборд од што буквално се распарчило на два дела и паднало во канал покрај патот.
Првичните информации беа дека има девет жртви, но лекарите успеале да го повратат во живот петгодишното момче. Загинатите се двајца мажи на возраст 35 и 20 години, четири жени на возраст 20, 30, 35 и 40 години и две девојчиња на возраст од две и шест години.
Од информациите на полицијата се вели дека дека комбето било со украдени регистарски таблички од Атина, на кое му биле додадени дополнителни седишта и во багажникот за да собере повеќе патници. Според надлежните, станувало збор за имигранти. Причините за несреќата се' уште се утврдуваат, но се претпоставува дека до трагедијата дошло поради голема брзина или, пак, поради проблем со возилото од преоптовареност. (М.П.)
|
