Вардар дели тројки како од шега
Во првите четири средби од првенството црвено-црните постигнаа 12 гола
Миодраг Мицковиќ
И во своите најдобри денови на почетокот на првенствата кога Македонија стана самостојна држава и кога Вардар имаше најсилен тим, неговите напаѓачи не беа толку ефикасни како на стартот на годинашново првенство. Вардарците како од шега ги испраќаат своите противници со по три гола во мрежата, на последните четири средби со Победа (3:0), Пелистер (3:0), Ренова (3:1) и на последното гостување во Куманово против Милано (3:1), постигнаа 12 гола, што е навистина одличен просек. Веќе е јасно дека црвено-црните се најголеми кандидати за титулата, создадоа силен тим кој се' уште треба да се доградува бидејќи покрај големата ефикасност вардарците покажаа извесни слабости во одбраната во која има доста „пукнатини“ така што им дозволија на играчите на Милано да создадат неколку мошне поволни прилики кои за нивна среќа останаа неискористени.
Она што најмногу радува тоа е што во Куманово победи фудбалот на мечот меѓу Милано и Вардар. Се играше навистина коректно, гледачите беа на ниво. Се' мина во најдобар ред, без инциденти и би сакале навистина таков фудбал да гледаме и во продолжението на првенството. За играчите на двата тима само комплименти и за добрата игра и за спортското однесување на теренот. Покрај Вардар, голема ефикасност на стартот на првенството покажаа и фудбалерите на Македонија од Ѓорче Петров кои во неделата до врв ја наполнија мрежата на Победа (5:0), и „жолтите“ се мошне силен конкурент на Вардар во борба за највисок пласман. Засилени со неколку играчи, со двајца извонредни Бразилци Де Брито кој против Победа постигна три гола и Вашингтон, фудбалерите на Македонија имаат право што се надеваат на висок пласман.
За Победа што да кажеме. Загубија во Куманово од Милано со 5:2, беа декласирани од Македонија со 5:0, од Вардар со 3:0, на свој терен загубија од Ренова со 1:0 и единствено со судни маки и со многу среќа во Прилеп го победија Напредок со 1:0. Како тргнаа на прилепчаните црно им се пишува во годинашново првенство, сериозно се ниша и столчето на шефот на Стручниот штаб, Николче Здравески, и нема да биде изненадување доколку биде сменет. Прилепчаните голтаат „кнедли“, разочарани се од игрите на нивните миленици и се бара спас како да се санира состојбата во клубот. Засега не се гледа некој излез.
Конечно, по серијата од ��етири нерешени средби, се израдуваа и навивачите на Работнички кога нивниот миленик во саботата многу среќно со голот во судиско продолжение дојде до победата против Металург, но тоа сега не е ни толку важно, инкасирани се три бода и во клубот веруваат дека со новите засилувања што ги добија во поранешните играчи на Вардар: голманот Јорде Георгиевски, Мојсов, Бојовиќ, Савиќ и Бразилецот Фабио, ќе можат и тие сега да конкурираат за највисок пласман, дури можеби и за титулата.
Во секој случај во продолжението на првенството се очекуваат многу поинтересни натпревари, но и оваа недела загрижува недисциплината меѓу играчите бидејќи судиите покажаа 31 жолт и два црвени картона. Најмногу ги имаше на мечот во Турново меѓу Хоризонт и Силекс кога нашиот најдобар судија, Александар Ставрев, покажа дури десет жолти и еден црвен картон. Што е многу, многу е. Интересно е да се напише и за мечот во Турново каде Хоризонт ја забележа првата прволигашка победа, доста среќно бидејќи Силекс практично сам се победи. Неговиот играч Шалески постигна автогол, а несреќата да биде уште поголема во 88 минута Силекс преку Нацков не успеа да реализира и удар од 11 метри.
|
