Валентино Роси најбрз и во Индијанаполис
Лидерот во Светскиот шампионат, Валентино Роси, го освои скратеното поради дожд гран-при во Индијанаполис и со својата четврта победа во низа ја зголеми предноста во трката за титулата во класата Мото ГП. Италијанецот, кој нема пораз уште од трката за Големата награда на САД во јули, беше прогласен за победник кога силниот дожд ја поплави славната патека „Брикјард“, поради што беше развеано црвеното знаме на седум круга до крајот. За Роси ова е 69. победа во кариерата.
Домашниот миленик Ники Хејден го освои второто место, а третото му припадна на тимскиот колега на Роси од Јамаха, Шпанецот Хорхе Лоренцо. Бранителот на титулата Кеси Стоунер од Австралија заврши четврти, со што му овозможи на директниот конкурент Роси да ја зголеми разликата на 87 поени на четири трки до крајот на сезоната. Италијанецот има 287, Австралиецот од Дукати 200, а трет е Шпанецот Дани Педроса од Хонда со 193 бода. |
