Владата и федерацијата во Полска се договорија
Извори од ФИФА велат дека крај на целата збрка ќе се стави на состанокот на ИК, кој ќе се одржи на 23 октомври
Претседателот на Меѓународната фудбалска федерација – ФИФА, Сеп Блатер, вчера изјави дека највисоката фудбалска институција добила писма и документи од Владата на Полска, во кои стои дека, сепак, е постигнат договор на релација Влада - Фудбалска федерација и дека денеска сето тоа треба и да се официјализира. „Добивме известување од Полска дека се договориле. За утре е договорена средба на која сето тоа треба да се потврди. Ако е тоа вистина нема да има никакви санкции за Полска“, изјави Блатер.
Само неколку часа пред таа изјава на Блатер сите светски медиуми го пренесоа во тој момент категоричниот став на Владата на Полска дека нема да ја смени одлуката за смена на раководството во Фудбалската федерација и нема за тоа да разговара со никого се' додека ФИФА не го повлече ултиматумот.
„Очигледно станува збор за војна на нерви, но ние нема да попуштиме пред уцени, дури и ако тие доаѓаат од големите меѓународни организации. Ќе го исчистам полскиот фудбал од корупција, колку тоа и да чини“, изјави премиерот на Полска Доналд Туск.
Инаку, ФИФА и даде на владата на Полска првичен рок до вчера попладне да ја повлече својата одлука за распуштање на Федерацијата и поставување нов принуден управник, со образложение дека политиката не смее да се меша во фудбалот. Во спротивно сигурно ќе следи супсензија, а Полска ќе ја загуби организацијата на ЕП 2012 година, кое треба да се игра и во Украина.
Вчера тоа го потврди и портпаролот на УЕФА, Вилјам Галард. „Правилата и законите се чисти. Ние и го дадовме Европското првенство на Фудбалската федерација, а не на владата. Станува збор за кршење на начелата во спортот. Не смееме да дозволиме владите по своја волја да ставаат политичари на раководните функции, наместо легално избрани функционери. ФИФА тука го има одлучувачкиот збор. Нашето трпение има лимит, а ситуацијата е многу блиску до тој лимит“, се закани Галард и додаде: „Доколку ФИФА не го пролонгира рокот, ние веднаш ќе реагираме“.
Извори од ФИФА велат дека крај на целата збрка ќе се стави на состанокот на Извршниот комитет, кој ќе се одржи на 23 октомври. Иако, вчера имаше и такви инфо��мации во кои се велеше дека Полска автоматски ќе ги загуби претстојните квалификациски средби за СП 2010 против Чешка и Словачка со 0:3.
|
