Индексот на Македонската берза најнизок годинава
Соња Маџовска
Македонската берза вчера доживеа најниска вредност на индексот МБИ 10 годинава. Тој вчера изнесуваше 4.255 индексни поени и отиде во минус за 1,9 проценти, со што се позиционира под лимитот за кој не се ни претпоставуваше дека може да го достигне, односно да се намали под 4.300 поени. Иако вчера беше остварен прилично добар промет од 40 милиони денари, во споредба со минатата недела, сепак, вредноста на акциите на речиси сите компании што го сочинуваат МБИ 10 повторно бележат пад. За инвеститорите најатрактивни се акциите на Комерцијална банка. Вчера беше остварен промет од 16,4 милиони денари и единствено оваа акција имаше благ раст на цената од 0,74 проценти. Една акција на Комерцијална банка се продаваше по цена од 5.120 денари. Вредноста на акциите на „Гранит“ се намали за 4,98 проценти, со што падна на 1.000 денари. Акциите на „Алкалоид“, исто така, се намалија за 3,44 проценти и се продаваа по цена од 5,627денари.
„Нема реална основа за ова што се случува на Македонската берза. Ништо не е променето во работењето на компаниите. Финансиските резултати им се добри, па затоа е нелогично што цената на нивните акции бележи ваков пад. Психолошкиот фактор за тоа што ќе се случува на светскиот финансиски пазар се' уште има пресудна улога. Очигледно враќањето во нормала ќе трае долго“, вели Евита Иванова од Македонската берза.
Турбуленциите на берзите никако да се смират и покрај одлуката на САД финансискиот пазар да добие инјекција од 700 милијарди долари. И Европа реагираше со дополнителни гаранции за одржување на стабилноста на финансискиот пазар. Сепак, овие потези засега не даваат видливи резултати. Вчера невиден пад бележеа сите берзи, вклучително и овие во регионот. Белградската држи рекорд со пад од 8,9 отсто, Љубљанската отиде во минус над 3 проценти, а Загрепската падна 5,83 проценти. Психологијата на неизвесност како ќе се надмине глобалната криза се' уште ги држи во паника инвеститорите, кои ги напуштаат берзите. Иако светските потреси имаат корен во финансискиот сектор, негативните ефекти најмногу и натаму се чувствуваат на берзите.
|
