ЕДИТОРИЈАЛ

Шоуто со билборди продолжува

Сања Наумовска

Не е тајна дека рекламирањето на билборди е доходовен бизнис. Сепак, колку и да е доходовен, за сметка на заработката не треба да се игнорираат безбедноста на граѓаните и естетиката. Рекламите на стотици билборди постојано се менуваат, сликите се вадат или се прелепуваат, а сето тоа носи многу пари. Се разбира, за оние што се директно поврзани со бизнисот.

На граѓаните им остануваат само празните џебови и пустите желби по колите, облеката, телефоните, козметиките и по се' друго што се рекламира секојдневно. И отворените прашања, да поминам ли под билбордов или може да ми падне на глава? Добро ли е зацврстено рекламното пано на покривот од зградава или поарно да не седнувам на тераса? Но, додека ние чекаме за ова да се свестат и надлежните, шоуто со билборди си продолжува.

Иако одамна со истечени договори за концесионирање, истите фирми се' уште заработуваат од хаосот со рекламните паноа. Се полни и градскиот буџет. Градските власти, кои се задолжени да ги испишат правилата на игра, некако не се брзаат да го донесат новиот правилник.

Пред некоја година направија обид самите да го изработат, па се премислија и решија да побараат консултант за да го направи тоа за нив. Засега нема ништо ниту од првиот обид ниту од вториот. А, задоволни се и оние што си ги рекламираат своите производи, бидејќи билборд си е билборд. Поставени на очиглед на целиот град и на илјадници луѓе, а ефектот никогаш не може да се спореди со реклама дадена во весник или во списание.

Но, како и секој бизнис, така и овој има слаба страна. Овој пат тоа е почитувањето на правилата и на законите. Билборд се поставува на секое ќоше што е добро видливо од раскрсница, од булевар, од кафуле или од ресторан. Не е важно дали ќе се затвори влез во куќа, во зграда, дали ќе се попречи видикот од тераса, дали ќе се нагрди дрворед. Не е важно ниту дали има место да помине пешак или велосипедист по тротоарот или ќе мора да се симне на улица. Важно е за рекламата да има место.

Иако надлежните тврдат дека ниту еден билборд не смее да им го одзема вниманието на возачите, зошто тогаш токму улиците и на булеварите во центарот на градот каде што се одвива најголемиот сообраќај, се преполни со реклами. Зошто сега кога веќе има стотици билборди и ситилајти по тротоарите, рекламите ги н��паднаа и зградите? А, таму, пак, владее вистински хаос. За да се развее платно од стотина, па и повеќе квадрати или да се нацрта чоколада или виски на фасада, треба дозвола само од куќен совет!

Вишок е прашањето колкава е стручноста и надлежноста на тројца, најчесто пензионери од куќниот совет, седнати на клупа пред зграда да одлучат дали е првенствено безбедно, а потоа и дали е лично на зградата да им се вее реклама. Секако, и за нив одлучувачки ќе биде финансискиот момент, кој ќе треба да ги покрие трошоците за чистачка и за лифт за следните неколку години.

Иако Законот нагласува дека за рекламно пано поголемо од 12 квадратни метри треба градежна дозвола, како и за секој друг објект, придружена со сите потребни документи за стабилност, безбедност, статика и слично, сепак, ретко некој голем билборд ја има. А, ако се случи, не дај боже, трагедија, сите ќе бегаат од одговорноста.

Решението треба да се очекува и да се бара во новиот правилник за поставување и концесионирање билборди, кој треба да го изработи Град Скопје. Граѓаните веќе со години го очекуваат, но по поништувањето на тендерот на кој се бараше консултант што треба да изработи правилник и нов модел на концесионирање со билбордите, очигледно е дека ќе се чека уште некоја година.

Во меѓувреме, бизнисот ќе си тече. Ќе носи пари, па многумина ќе подзамижуваат на неправилностите.