Необележани полициски возила ловат сообраќајни грешки

Македонската полиција по теркот на колегите од регионот

Горан Адамовски

Си возите најнормално, но ви се поткраднува некоја помала грешка во сообраќајот или, пак, свесно минувате на црвено, не застанувате на пешачки премин, возите пребрзо. Погледнувате лево-десно, нема полиција, си терате по старо. Ве престигнува автомобил, необел��жан, обичен. Штом му го видите „грбот“, се појавува светлечка табла „стоп полиција“, трепкачите светат во црвено и сино. Од возилото ви сугерираат да застанете крај патот. Излегуваат униформирани полицајци. Се легитимираат и ви велат дека сте направиле прекршок. Ве казнуваат според пропишаните закони.

Ваквите сцени не се случуваат само низ европските земји или во државите од регионот, туку и во земјава. Од почетокот на годинава и македонската полиција во цивилни возила лови сообраќајни грешки.

„Станува збор за необележани возила, опремени со најсовремена техника, кои ги снимаат сообраќајните прекршоци“, објаснуваат од Министерството за внатрешни работи.

Поголемиот дел од граѓаните воопшто не беа информирани за оваа новина, поради што често се случува да се караат со полицајците што ги запираат на овој начин, прашувајќи ги дали Законот им го дозволува тоа.

„Возев низ Скопје, веројатно, побрзо од дозволеното. Еден автомобил со затемнети стакла се обидуваше да ме престигне. Јас па уште се чудев, ‘види го овој колку брзо вози‘. Кога видов ‘стоп полиција‘, ми светна. Излегоа полицајци во униформа, ми велат дека снимиле се' и дека ме чека казна. Не ми беше јасно од каде излегоа, дали смеат така да ловат грешки, ама ми објаснија дека тоа било новина. А за казната што да правам, ми покажаа дека е снимено се', не можеш да се вадиш дека се грешка“, вели еден скопјанец што ја контактираше нашата Редакција.

Овој новитет кај нас веќе со години функционира и во земјите од регионот. Во Хрватска постои специјализирана единица „кобри“, чии припадници ловат брзи возачи по нивните модерни автопатишта. Загрепските медиуми речиси секојдневно информираат за дрски возачи, кои со брзина од над 250 километри на час летаат по автопатиштата, кои, патем, некаде се опремени и со видеокамери. Најновиот таков пример се случи пред три дена кога полски државјанин со својот автомобил по автопатот „Далматино“ возел со 236 километри на час, па „кобрите“ не можеле да го стигнат се' до наплатната рампа кај Загреб. Платил речиси 1.000 евра казна, но се спасил од одземање на возачката дозвола.

Наш државјанин, пак, во Црна Гора минал со казна до 30 евра. Како што вели, по кањонот Морача се создала колона возила што се движела споро. Еден автомобил постојано возел цик-цак и се лепел до возилата.

„Се расчисти колоната, почна да се вози нормално, а јас, токму за да не направам прекршок - возев во границите на нормалата. Тој автомобил се залепи зад мене, а бидејќи престигнувањето на тој пат не е паметна идеја, си помислив дека го кочам, па затоа и забрзав малку. Веднаш ме престигна, ја вклучија таблата ‘полиција‘ и ме казнија. Се обидував да им докажам дека на некој начин забрзав поради нив, ама бадијала“, вели нашинецот.

Возачите во земјава се поделени во мислењата дали цивилните сообраќајци треба да ловат низ патиштата. Според едни, ова е само уште еден начин за собирање пари од граѓаните, додека според други, нашето „индијанско возење само вака може да се стави во ред“.