Поглед

Заборавено училиште

Катица Чангова

Министерот за образование, Никола Тодоров беше на одмор во Грција, а откако се врати, не може глава да крене од работа. Му се случија триста чуда во секторот и тој стана центар на случувањата.

Се' тргна со спорниот учебник по општество за петто одделение, скандал што се претвори во серијал, небаре глед��ме телевизиска сапуница. Излегоа многу грешки. Актери, музичари и водители се рангирани како културни дејци. Катастрофални промашувања се откриени во речиси секое поглавје. Очекувано падна одлука за повлекување на учебникот. Министерот ги прозва рецензентите за пропустите, а тие не прифатија одговорност.

И во ова министерско-рецензентско препукување кој е прав, а кој крив, стигна закана за бојкот на часови поради загаден канал. Арачиновци немало да пуштаат деца на училиште оти се плашеле од епидемија. Го викнаа Никола Тодоров и го прошетаа кај страшното место да го уверат во нивните стравувања. Тој вети, ќе среди се' за две недели.

Камо среќа Тодоров да ги симне од дневен ред сиве овие маки, кои чинат пари. Штетата од препечатувањето на учебникот е милион денари, а и чистењето канал не е евтино. Но, има и други што чекаат решенија и пари, а ни се помалку важни ни помалку значајни. Зошто се игнорира проблемот со училиштето во Дреновец, кое цела учебна година е под клуч? Дали министерот заборави дека пред една година токму тој пресече црвена панделка на многу убав и простран објект, за 500 ученици во една смена. Таму ниту инвентар допатува ниту персонал се вработи. Учениците и родителите најавуваат бојкот на наставата. Срамно и жално и за Тодоров и за државата е да пропаѓа инвестиција од 120 милиони денари, која требаше да го реши просторниот проблем за учениците од Тетово.