Л.А. Лејкерс и Орландо со „метла“ до конференциските финалиња

„Езерџиите“ ја елиминираа Јута со 4:0, со истиот резултат „магичните“ ја добија серијата со Атланта

Кошаркарите на Лос Анџелес Лејкерс и Орландо ја потврдија доминацијата во полуфиналните дуели против Атланта и Јута и се пласираа во финалето во своите конференции.

„Магичните“ засега остануваат единствени без пораз во годинашниот плеј-оф. Во серијата против Атланта постигна 101 поен повеќе што е највисока разлика во историјата на разигрувањето за шампионскиот прстен кога една екипа минува во наредната рунда со победа од 4:0. Противник на Орландо во финалето на Истокот ќе биде подобриот од дуелите меѓу Бостон и Кливленд.

Винс Картер беше лидер на „магичните“ во четвртата средба со Атланта. Постигна 22 поена, а целиот состав на Орландо погоди 16 тројки и водеше од почетокот до крајот. Најефикасен кај „јастребите“ беше Џамал Крафорд чиј тим по вторпат во низа е елиминиран во второто плеј-оф коло. Првиот стрелец на екипата на Атланта, Џое Џонсон, по завршување на сезоната е слободен играч, а публиката ги исвиркуваше по третиот меч за коментарите што ги даде во медиумите за начинот на нивното навивање. Но, дали тој ќе го продолжи договорот не е единствена дилема бидејќи договорот му истекува и на тренерот Мајк Вудсон.

Во западната конференција лејкерси ја совладаа Јута со 111:96 за завршување на работата со „џезерите“ со чисти 4:0. Доминантна фигура беше Пау Гасол со 33 коша и 14 скока, Коби Брајант уфрли 32 за актуелниот НБА шампион кој уште на полувреме имаше комотна предност 58:41.

Во третиот период Јута се доближи на 70:65 по положувањето на Карлос Бузер, но „езерџиите“ одговорија со кош на Брајант, потоа следуваше тројка на Одом, па слободно фрлање на Брајант и погодок на Гасол за водство од 80:67 на прагот на последната четвртина. По 21 поен за Јута уфрлија Дерон Вилијамс и Пол Милсап. Во финалето на Западот екипата на Лос Анџелес Лејкерс ќе се сретне со Феникс.

„Свесни сме не' очекува тешка битка. Затоа сакаме што е можно поподготвени да ја дочекаме финалната серија, и секако да бидеме здрави“, рече Пау Гасол во пресрет на западната финална серија. За него и неговите соиграчи следува еднонеделен одмор што во секој случај ќе им биде добредојден за третман на ситните повреди што го мачат дел од тимот.

Резултати: Јута - Лос Анџелес Лејкерс 96:111 (Лос Анџелес Лејкерс победи со 4:0), Атланта - Орландо 84:98 (Орландо победи со 4:0).