ЕП во ватерполо се сели од „Арена“

Ако ЛЕН одбие да се игра во базенот на Младост, првенството ќе го добие Манчестер

Наместо во „Арена Загреб“, 29. Европско првенство во ватерполо, на кое ќе учествува и Македонија, по се' изгледа ќе се пресели во базенот на Младост на Сава. Но, тоа треба да го аминува Европската ватерполо федерација (ЛЕН), чија што делегација доаѓа во Хрватска на 18 мај. Во случај на негативен одговор, шампионатот ќе го добие Манчестер, кој веќе се понуди како резервна опција. Првенството треба да се одржи од 29 август до 11 септември.

„По осум месеци тешка борба, не успеав“, разочаран е претседателот на Хрватскиот ватерполо сојуз, Перица Букиќ. „Шансите првенството да се одржи во ’Арена‘ веќе речиси и да не постојат“.

Клучниот проблем е во тоа што градот одбива да потпише договор со концесионерот на салата „Ингра“ со кој би се обврзал да ја надомести евентуалната штета за време на ЕП. „Ингра“, која го постави 20 мај како краен рок за усогласување, се плаши дека од влагата би можеле да настрадаат електронските уреди во ултрамодерниот објект што лани беше домаќин на Светското првенство за ракометари. Монтажните базени поставени во салите во кои се одиграа ЕП 1993 во Шефилд и СП 2003 во Барселона, сепак, не предизвикаа никакви оштетувања.

Извлекувањето на групите за претстојното ЕП ќе биде извршено на 21 мај на плоштадот „Бан Јелачиќ“ во Загреб. Покрај Македонија, домаќинот Хрватска и бранителот на титулата Црна Гора, ќе настапат и Србија, Унгарија, Италија, Германија, Шпанија, Русија, Грција, Романија и дебитантот Турција. Прелиминарната фаза ќе се игра во две групи со по шест селекции.

Македонските ватерполисти, кои пред две години во Малага го освоија осмото место, за своето второ учество едноподруго на еврошампионатите се изборија како второпласирани во квалификациската група во Волос. Таму ги победија Франција со 9:8 и Словенија со 7:4, а загубија од Грција со 11:5. (Р.Д.)