Португалците го плаќаат цехот за Летонците
Македонските кошаркари решени вечерва да ја остварат првата победа во квалификациите за ЕП
По несреќниот пораз во средата во Летонија, македонските кошаркари бараат одмазда во вид на победа над Португалија вечерва од 20,15 ч. во салата „Борис Трајковски“ во Скопје во рамките на второто коло од групата Б од квалификациите за Европското првенство 2009 во Полска. Најдобар лек за санирање на раните од Рига, кога ни две меч-топки преку слободните фрлања на Мираковски во финишот на основниот дел и на Илиевски во продолжението не беа доволни за стартно славење, е висока и убедлива победа над противникот совладан во пет од досегашните шест меѓусебни дуели. Македонија е фаворит и поради неочекуваниот дебакл на Португалците против аутсајдерот Естонија, од која во средата дома загубија со 79:70 по катастрофалната последна четвртина, во која дадоа само 11 поени, а примија 26.
Сепак, селекторот Јовица Арсиќ е внимателен во изјавите.
„Не' очекува тежок натпревар. Португалија е противник за респект. Не планираа пораз на стартот, па очекувам да нападнат со сета сила и да се обидат да ги искористат нашите слабости, бидејќи нема што да загубат“, резонира тој. „Очекувам голема помош од публиката, бидејќи победата ни е многу потребна. Притисокот е голем по оној несреќен пораз во Летонија“.
Добра вест од македонскиот табор е враќањето на повредениот ветеран Перо Блажевски, кој ја санира повредата и вчера тренираше со другите репрезентативци, па можеби ќе биде и во почетниот состав. Затоа, пак, неизвесен е Дарко Соколов, кој се повреди во Рига.
Црномурниот Карлос Андраде беше најдобар во португалскиот состав против Естонците. За 26 минути во игра постигна 14 поени, а имаше и по три скока и украдени топки пред да излезе поради пет лични грешки.
Натпреварот ќе го води судиската тројка Миливое Јовчиќ од Србија, Николаос Пападимитриу од Грција и Владимир Цеков од Бугарија. Во другиот меч од групата Естонија попладнево ја пречекува Летонија. (Р.Д.)
|
