Насловна

Поглед

Разоружена полиција

Даниела Трпчевска

Полицаец што бил ангажиран на протестите за трагично загинатиот Мартин Нешкоски, останал без пиштол! Оваа вест што ја лиферуваше полицијата во екот на граѓанскиот револт од прекумерна употреба на сила и бруталност од страна на специјалците, не може, а да не предизвика чудење кај јавноста. Македонскиот полицаец што ги поминал најдобрите тренинзи и обуки, кој во својот џеб го носи упатството како да се однесува на терен и да се справува со сите непредвидени ситуации, оној силен и храбар полицаец што секое попладне го „брани“ Министерството од младите што протестираат и „напаѓаат“ со зборови и транспаренти, токму тој останал без својот пиштол од голораката толпа!

Ако му се верува на она што е објавено во полицискиот билтен, тогаш полицаецот бил жртва на четири лица. Тие го собориле, го удирале по колена, го туркале, а тој изгубил рамнотежа и пробал да се фати за трафика за да не падне!? Потоа му го извлекле пиштолот и побегнале. Дали крадците се дел од протестната поворка, дали пиштолот го земале од шега, од желба за одмазда или револт, допрва ќе се утврдува.

Оваа случка е вистинска парадигма на она што ни се случува деновиве. Додека цели бригади млади луѓе се кренаа на нозе да и' кажат стоп на полициската бруталност, која во својот најлош облик беше манифестирана токму врз младиот Мартин, полицијата, од друга страна, се обидува да се претстави како жртва по која сите маваат, а тие мора да молчат и да им го дадат својот пендрек и пиштол!

Неделата започна со брутално убиство, продолжи со масовни протести, а се заокружи со кражба на службен пиштол. И се' ќе биде в ред доколку во билтенот не му беа посветени повеќе редови на фамозниот пиштол, отколку на момчето што беше оставено мртво на клупа, токму од оние што треба да го бранат и да го штитат.