Насловна

Бергант: Македонија ќе остане сива зона

Според словенечкиот амбасадор, земјата нема друга алтернатива, освен ЕУ и НАТО

Првата задача на новата македонска влада ќе биде продолжување на реформите и решавање на најзначајното прашање за евроатлантските интеграции на Македонија - продолжување на преговорите со Грција, изјави амбасадорот на Словенија во Македонија, Ален Бергант.

„Се надевам дека што поскоро ќе се најде компромисно решение, а како што зн��еме, сега сите партии во парламентот постигнаа согласност за референдум. Значи, кога ќе се најде компромисно решение, заедно владата, Собранието, опозициските партии, претседателот на државата да излезат пред македонскиот народ и да кажат - ова е компромисно решение, ова е добро за Република Македонија и тоа ќе значи напредок кон НАТО“, вели Бергант за Радио Слободна Европа.

Тој посочува дека од државите во регионот Црна Гора добро напредува и веќе има кандидатски статус, така што очекува Подгорица да добие некои позитивни сигнали од Брисел, а можеби и Србија.

„Се надевам, на овој воз да и' се приклучи и Македонија, значи да не биде изолирана, туку да се движи напред. Оваа Влада има одговорност да го направи тоа бидејќи околу 90 отсто од граѓаните на Македонија се за приклучување во НАТО, за европска иднина на земјата, а тоа значи и подобар живот“, посочува Бергант.

Според него, Македонија нема друга алтернатива, освен приклучување во НАТО и во ЕУ.

„Македонија не може да биде сива зона тука на Балканот. Имате две соседни држави, Бугарија и Грција што се членки на двете организации, Албанија на една од нив, Србија, исто така се движи напред, така што мислам дека не треба и воопшто да се размислува бидејќи немате друга подобра алтернатива од ЕУ и од НАТО. Поради тоа, уште еднаш сакам да повторам дека треба да се продолжи со реформите и убеден сум дека годинава ќе можеме да забележиме успех во натамошното приближување на Македонија кон ЕУ и кон НАТО“, изјави словенечкиот амбасадор Ален Бергант. (МИА)