Постојат документи кој ја создал ВМРО-ДПМНЕ

Има само една вистина – партијата е производ на Движењето за обединување на Македонија, а нејзин основач е Драган Богдановски, тврдат некои од основачите од дијаспората

Даниела Трпчевска


Нека престане чукањето в гради кој ја формирал ВМРО-ДПМНЕ, оти постојат документи што докажуваат кој ја формирал партијата. Таа е производ на ДОМ – Движењето за обединување на Македонија, чиј претседател беше Драган Богдановски. Од него подоцна се формираше ДПМНЕ, како партија која беше иницирана во дијаспората. Шест месеци подоцна беше донесена одлука партијата да се прошири и во Македонија и тука да го продолжи своето дејствување. Со предлог на Борис Змејковски беше додаден префиксот ВМРО, по што се формираше ВМРО-ДПМНЕ. Борис Змејковски воопшто не фигурираше во првичната партија ДПМНЕ, која се формираше во дијаспората, и за тоа сведочат многу документи. Ова го тврдат заслужни членови на ВМРО-ДПМНЕ кои финансиски ја поддржувале партијата од дијаспората.

Соговорниците со кои разговаравме вчера, а кои инсистираат на анонимност, нудат серија документи и преписки меѓу основачите на партијата во дијаспората, во која во детали се образложува идејата за формирање на партијата, чекорите што биле преземени и притисоците на кои биле подложени идеолозите на ВМРО-ДПМНЕ, кои биле следени од тајните служби.

„Сите што учествуваа во формирањето на ДПМНЕ надвор од Македонија може да се каже дека се основачи на партијата, па и сите оние што биле на основачките собранија во земјава имале свој удел како основачи. Ако Љупчо Георгиевски и Змејковски биле основачи, тогаш зошто се одделија и формираа свои партии, кои немаа поддршка како што има партијата од која излегоа. Зошто не формираа партија со иста тежина или не го повлекоа членството од ВМРО-ДПМНЕ со нив? Тоа само укажува дека не била силата кај нив, или идеологијата им била погрешна“, коментираат дел од членовите на ВМРО-ДПМНЕ од дијаспората.

Според нив, најбитен документ што ги потврдува ваквите тези е писмото кое Драган Богдановски, основачот на партијата, го испраќа до Душко Дојчиновски на 1 февруари 1990 година. Во него тој го информира за постоењето на Демократската партија за македонско национално единство во дијаспората и за плановите таа да се прошири со дејствување и во Македонија.

„Во врска со илинденската партија за која зборуваш дека треба да ја создадеме, ние веќе надвор во емиграцијата ја создадовме таа партија под името Демократска партија за македонско национално единство, која наскоро ќе испрати службено барање до Собранието на Југославија, до Сојузниот извршен совет, до Собранието на Македонија, до Републичкиот извршен совет на СРМ, до Народното собрание на Бугарија, до парламентот на Грција и до владата, во кое се бара партијата да се конституира и внатре во сите три дела на Македонија и како ДПМНЕ да работи по парламентарен пат за македонското национално и територијално обединување“, се вели во писмото на Богдановски.

Тој истовремено информира дека ќе бараат од трите балкански влади меѓународна гаранција оти нема да бидат затворени функционерите кои ќе се вратат во Македонија за да ја конституираат и легализираат партијата. „Моето враќање назад во СРМ ќе зависи од процесот на демократизацијата и од одлуката што ќе ја донесе раководството на нашата партија која сега се конституира до сите земји во кои живее македонска емиграција“, пишува Богдановски, кој во прилог ја доставува и политичката платформа на ДПМНЕ која веќе била изработена.

Ваквата теза во своето писмо до јавноста ја изнесе и Гојко Јаковлески од Берлин, ��ден од основачите на ВМРО-ДПМНЕ. „Со Драган Богдановски бевме блиски пријатели и соработници над пет децении, не' споија илинденските идеали за обединета Македонија. Во развојот на задграничните политички организации е значајно и тоа што во ресторанот ’Ново Скопје‘ во Западен Берлин во 1972 година, на средбата што ја имав со Благоја Шамбевски–Шамбе и Јован Гарвански, се договоривме партијата да го промени името од Ослободителен комитет на Македонија (ОКМ) во Движење за ослободување и обединување на Македонија - ДООМ. Меѓутоа, по грешка беше насловена со едно „о“ помалку и беше насловена во ДОМ. Подоцна оваа грешка беше исправена“, објаснува Јаковлески.

Тој додава дека во почетокот на 1990 година, Богдановски, кој живеел во Гетеборг, Шведска, му се јавил и го запознал со идејата за формирање на ДПМНЕ. „Откако добро размислив, ја прифатив идејата и по два дена му се јавив и му го соопштив мојот позитивен став. Средбата беше одржана во Минхен на 31 мај и на 1 и 2 јуни 1990 година. Покрај мене, на состанокот присуствуваа Драган Богдановски, Љупчо Георгиевски, Борче Змејковски и Владо Транталовски“, пишува Јаковлески.

И Богдановски барал Змејковски да биде исклучен од партијата

„Ве молам браќа и сестри да му дадете поддршка на претседателот Љупчо Георгиевски во неговите настојувања да го исчисти раководството на нашата партија од криминалните елементи од типот на Борче Змејковски кои ги користат своите раководни места за лични интереси“. Ова се наведува во писмото кое Драган Богдановски го испратил од Шведска до членовите на ЦК на ВМРО-ДПМНЕ во Скопје.

Во писмото понатаму се наведува дека Змејковски самиот се прогласил за генерален секретар на партијата и дека не бил избран на тоа место од ниту еден форум на партијата.

Некои од основачите на партијата од дијаспората тврдат дека станува збор за оригинална преписка во која се наведува сумата на пари кои од дијаспората биле испраќани во земјава и за партијата и на лични сметки на некои од членовите.