Груевски: Имаме најниски трошоци и нудиме милионски пазар

Во интервју за канадска телевизија, премиерот не негира дека земјава за годинава очекува раст од два отсто, што е помалку од планoвите во буџетот

Македонија има најниски трошоци за водење бизнис, најниски даноци, стабилна економска политика и ниска задолженост, а обезбедува и милионски пазар. Со вакви предности ја претстави земјава премиерот Никола Груевски, во интервју дадено за канадската телевизија „Бизнис Њус Нетворк“ во Торонто, каде што се наоѓа наша владина делагација која е во политичко-економска посета на Канада и САД.

„Се' што некој произведува во Македонија може да биде извезено во ЕУ без царински давачки, и од Македонија може да биде покриен пазар од 660 милиони луѓе. Друга важна работа што Македонија ја нуди се најниски трошоци за водење бизнис, не само даноци, туку се' останато. Не постои земја во Европа што нуди пониски трошоци за водење бизнис. Од друга страна, имаме висок потенцијал со голем број на високо образовани луѓе, подготвени да им се придружат на компаниите. Има стабилна пазарна економска политика, ниска задолженост од 28 отсто од БДП, ниска инфлација. Плус, ние имаме слободни економски зони што нудат специјални поволности за компаниите што доаѓаат. На пример, една од бенефициите е 10 годишно даночно ослободување за компаниите што инвестираат во слободните економски зони“, изјавил премиерот.

Интересно е што премиерот не го демантирал новинарското прашање „како земјата и' одолева на глобалната криза, а има најниски даноци и најавува за оваа година раст на БДП од два проценти“, бидејќи е познато оти во ребалансираниот буџет се проектира дека земјава ќе оствари економски раст од 2,5 отсто. Тоа беше причина дел од македонските новинари да прашаат од кога проекцијата за БДП е сведена на два отсто, и дали можеби, не е на повидок нов ребаланс на буџетот.

На ова прашање Груевски посочил дека причина за успехот се владините мерки за градење добра бизнис клима. „Откако започна глобалната криза презедовме серија мерки и се фокусиравме на тоа како да им помогнеме на компаниите, без оглед дали се домашни или странски, да го поминат ова време со што помалку штета. Како резултат на многуте реформи, нистите даноци, со еден проект Регулаторна гилотина со која скусивме многу бирократија, создадовме подобра бизнис клима. Како резултат на ова позицијата на земјата во изданието на Светска банка ’Дуинг бизнис‘ беше драматично подобрена“, рекол Груевски.

Прашан зошто Македонија сака да стане дел од ЕУ, во време кога таа се соочува со низа проблеми и не е ли подобро земјата да почека, премиерот е дециден дека споделуваме исти вредности. „Главно, наша стратешка цел е да се придружиме на ЕУ, пред се', бидејќи целиот регион каде што е Македонија, Балканскиот полуостров, се движи кон ЕУ. И добро е што тоа се случува, бидејќи ЕУ има подобри стандарди кои ние ги вградуваме во нашата земја и регионот. Има голема поддршка од фондовите на ЕУ за земјите што се приклучуваат на ЕУ, така што има многу причини. Ние ги делиме и истите вредности со западна Европа и тоа е една од причините зошто сакаме да сме таму“, истакнал Груевски. (Ек.Р.)