Поглед

Честитките на Ахмети

Гордана Дувњак

Лидерот на владејачката ДУИ, Али Ахмети, викендов беше многу вреден. Не го мрзеше да им испрати одделни писма на секој од четворицата шефови на држави од регионот.

Во дописот упатен до претседателите на Македонија, Косово, Албанија и на Црна Гора, тој на Иванов, Сејдиу, Топи и Вујановиќ им искажа честитки за нивното залагање за регионалните и за европските процеси. Ги пофали за лидерство и за промовирањето европски вредности во регионот.

Добрата практика почната во Валона и во Охрид се покажа уште еднаш, овој пат со средбата во Призрен, напиша Ахмети. Не заборави да ги спомене ни слободното движење на граѓаните, ни борбата против организираниот криминал, ни патот на реформите, ни искрената соработка меѓу четирите земји, бидејќи тоа им гарантирало на народите добра иднина, како и постојан економски пораст.

Колку и да му звучат некому ваквите зборови охрабрувачки и куртоазно, малку се збунувачки. Во кое својство се јавува првиот алтернативец? Партиски лидер на политички субјект во Македонија или, пак, регионален патрон на сите Албанци северно и источно од Тетово.

А, по пораките што ги упати до првите луѓе на четири независни држави, повеќе личи како да е еврокомесарот за проширување.

Камо среќа да е олку агилен лидерот на ДУИ и на домашен терен. Неговата партија веќе подолго време се однесува како да е опозиција, која нема никаква врска со потезите на владејачката партија, а не активен партиципиент во власта. Ќе излезе некој пратеник од неговата партија жестоко да ги критикува владините политики, па по некое време, еве ти го Ахмети - смирува.

Очигледно, лидерот на ДУИ има проблем со ролјите. Тесна му е партиската кожа или, пак, му работи потсвеста?