Телевизиите да платат двојно или отидоа лиценците

Националните телевизии и радија треба да платат двојно повисок надомест

Националните телевизии и радија треба да платат двојно повисок надомест за поседување на концесијата за вршење на радиодифузна дејност, во споредба со лани. Тие одбиваат да платат, но од Советот за радиодифузија предупредуваат дека Законот е јасен и ако радиодифузерите не платат навреме, можат да останат без дозволите.

Откако Советот годинава им испратил на приватните телевизии и радија двојно повисоки фактура, тие остро реагираат. Од националните телевизии со кои разговаравме вчера објаснуваа дека тие одбиле да ги платат овие фактури, а бараат и објаснување од Советот и од Државниот завод за статистика зашто сумата е толку повисока.

„Непријатно сме изненадени од фактурите што ги добивме од Советот за радиодифузија за плаќање на дозволата за вршење радиодифузна дејност за 2010 година. Минатата година плаќавме по 22.700 евра, а годинава треба да платиме 39.000 евра. Нас ни е многу и за тоа протестиравме. Бараме да се преиспита тоа. Вообичаено, овој надомест Советот го преместува врз основа на податоци дадени од Државниот завод за статистика. А во тие податоци главен параметар е БДП на глава на жител, кој изнесува 3.282 евра. Излегува дека во кризна година треба да платиме многу повеќе отколку што сме плаќале претходно“, вели Ристо Лазаров, директор на телевизијата Телма. Тој прашува дали БДП на глава на жител пораснал толку многу и како е можно тоа да им стигне за наплата во кризн�� година кога тие воопшто не го чувствуваат тоа во своите приходи.

Истото го објасни и Сашо Орадовски, директор на Алсат Телевизија.

„Не можеме да разбереме како се случи ова. Какви податоци испратила Статистика, а врз основа на тие податоци, пак, Советот за радиодифузија ни испрати фактури повисоки за над 15.000 евра што треба да ги платиме. Како е можно БДП да биде толку повисок“, прашува Ордановски.

Од Советот за радиодифузија, пак, објаснуваат дека врз основа на строго определена формула се пресметува надоместокот што го плаќаат радиодифузерите секоја година, а доколку не го сторат тоа во рок од две недели откако ги примиле фактурите, ќе им биде одземена дозволата за работа. „Со жалење можеме да констатираме дека некои радиодифузери не се задоволни од висината на БДП, врз чија основа се одредува надоместокот за дозволите вршење радиодифузна дејност, согласно со Законот за радиодифузија. Советот за радиодифузија не може да влијае ниту врз пресметката на БДП ниту, пак, има ингеренции да го измени Законот, кој пропишува дека секој радиодифузер за да може да врши радиодифузна дејност, мора да го плати надоместокот за дозволата. Законот јасно предвидува начин како се пресметува надоместокот за дозвола за вршење радиодифузна дејност и тоа мора да се почитува“, велат од Советот за радиодифузија. (С.М.)