Црвенковски почна битка за предвремени избори

Опозицијата го обвини Груевски дека води погубна политика, а Македонија тоне во жив песок

Билјана Јовановска

Неколку десетици илјади луѓе од сите краеви на државата, ама и забележливо голем број скопјани, во неделата вечерта ги окупираа сите приоди кон Владата каде што се одржуваше големиот протест организиран од СДСМ. Опозициската партија на власта ��' покажа дека постои и една поинаква Македонија од онаа на рекламните спотовите на Владата - Македонија во која има стотици илјади незадоволни, обесправени, луѓе што не можат да врзат крај со крај, но кои и покрај притисоците и застрашувањата, сепак, присуствуваа на народниот собир.

„Аууу ама ве има, многу сте, а ја мислев дека само моите стечајци се незадоволни“, можеби беше најдобрата и најискрена реакција за бројноста на присутните на митингот, која онака од срце ја изговори Лилјана Георгиевска, претставничката на стечајните работници.

Како што се очекуваше, Бранко Црвенковски, лидер на СДСМ, кој, практично, од 2002 година не одржа говор пред толкав број луѓе, од собирот ја испрати пораката дека оттука ја почнуваат битката за предвремени избори. Потенцирајќи дека тие се одговорна партија и не би направиле чекор што ќе и' наштети на државата, Црвенковски рече:

„Избори пред ноември би биле погубни за иднината на земјата, па затоа ниту такви избори бараме ниту на нив ќе учествуваме. Но, без разлика на исходот од Самитот на НАТО, без разлика дали преговорите со Грција ќе завршат успешно или не, наша цел е во ноември Собранието да се распушти и да излеземе пред граѓаните. Тие нека одлучат за каква Македонија и за каква иднина се - за онаа на власта или за оваа на народот. За Македонија што пропаѓа или за Македонија што напредува. За Македонија што слави порази или за Македонија што победува. Ние се изјаснивме дека сме за победничка Македонија“.

Обвинувајќи го премиерот Груевски дека државата ја заглави во жив песок, шефот на СДСМ потсети дека „четири години во Македонија се владее не со градење на иднината на оваа земја и народ, туку со копање по историјата и создавање лажни митови, а историјата е таква каква што и неа никој, па и ние, не можеме да ја промениме“.

Црвенковски, кој честопати во текот на обраќањето беше прекинуван со бурен аплауз, обвини дека власта постојано повторува дека оваа Влада како никоја претходна не вложувала во земјоделството, но не можат да објаснат зошто од година во година вкупното земјоделско производство опаѓа, зошто пропаѓаат јаболкарите, пченкарите, млекарите...

Говорејќи за најпопулистичките експерименти во сите области, чии последици ќе се чувствуваат со децении, Црвенковски обвини дека „во овие четири години вкупните буџетски средства што ги потроши Владата се за 4 милијарди повеќе од четирите буџети заедно во периодот од 2002 до 2006 година“. Тој праша каде завршија овие пари, бидејќи, како што кажа, „нови автопатишта не видовме, а единствени изградени во овие 20 години се оние од времето на СДСМ - 130 километри во вредност од над 220 милиони евра. Нови енергетски објекти не видовме. Единствениот изграден во овие 20 години - хидроелектраната ’Козјак‘ од 130 милиони евра е од времето на СДСМ“.

Црвенковски низ неколку примери ја посочи апсурдноста на енормните износи што ги дава власта за своите проекти. Во тој контекст праша како е можно споменикот посветен на Мајка Тереза дониран од Трифун Костовски и од авторот акад. Серафимовски да чини 90 илјади евра, а споменикот на Ченто цели 780 илјади евра? За лидерот на СДСМ е нелогично и реконструкцијата на Градскиот стадион во Скопје да чини повеќе од изградба на еден нов стадион на кој се игра Светското првенство во фудбал во Јужна Африка, и како е можно споменикот на Александар Македонски да чини колку три фабрики на „Џонсон контрол“ со сета технологија?

Расчистувајќи ја дилемата што е патриотизам, а што предавство, претседателот на СДСМ рече: „Точно е дека во оваа земја пред 20 години први луѓето од ВМРО-ДПМНЕ проговорија за независност, за македонска армија, дипломатија, репрезентација. Тоа е факт и мора да се почитува. Но, исто така, е точно дека независноста се стекна, меѓународното признавање се избори, членство во ОН се достигна кога на власт во државата беше СДСМ. Што е поголем патриотизам? Нешто да се зборува или нешто да се прави?“.

Црвенковски не го заобиколи ниту проблемот со името, нагласувајќи дека нема Македонец што сака да го смени уставното име на државата. „Јас сум првиот што не сака да се случи тоа, што тврди дека Грција спроведува неправедна, недемократска, неевропска политика кон Македонија. Но, тој факт не ме ослободува одговорноста да размислувам за иднината на мојот народ, да најдам одговор на прашањето како и што натаму“, порача шефот на СДСМ.

На собирот од името на опозицискиот фронт што го сочинуваат 16 партии се обрати Ѓорѓи Оровчанец, кој истакна дека „Груевски, кој спие кога сите работат и кој си легнува кога сите стануваат, успеа во две работи: првата е криминалот и корупцијата на власта, кои сега царуваат во државата и втората работа - го подели народот по сите основи“.

За кошмарот, понижувањата и за заканите низ кои поминуваат млекопроизводителите говореше сточарот Душко Илиевски, а во сличен тон беше и кусото обраќање на доскорешниот портпарол на Фондот за здравство, Дејан Гацов. Тој појасни дека се повлекол од таа функција, бидејќи, како што рече, повеќе не можел да лаже во интерес на рејтинзите и интересите на Груевски и на неговите најблиски соработници“.

На народниот собир што траеше близу два часа, за причините за приклучувањето на здружението „Граѓани за европска Македонија“ кон фронтот говореше Жарко Трајановски, нагласувајќи дека ако политиката е толку моќна и се меша во нашите животи, ред е и граѓаните на свој начин да се замешаат во политиката. На листата говорници беше и архитект Мирослав Грчев, кој рече дека „нема Македонец што не знае дека коњите се навреда за Гоце и Даме зашто вистинската македонска борба се водела пеш и во опинци! Бетонскиот барок и бронзените лавови и коњи само ја нагласуваат забеганоста и ненародната природа на овие градителски зафати“.

Масовниот собир заврши без какви било инциденти, а неколку десетици илјади учесници, како што е вообичаено на вакви протести, зад себе оставија купишта пластични шишиња и лименки, за чие отстранување многу брзо се погрижија екипите на „Комунална хигиена“.