Непартиски кандидат за градоначалник на Битола!?

ВМРО-ДПМНЕ го опипува пулсот на граѓаните за тоа кој е најпопуларен за да биде градоначалник, па го мери рејтингот и на непартиски луѓе

Битола - Непартиски човек за градоначалник на Битола, поддржан од владејачката ВМРО-ДПМНЕ! Оваа дилема се наметна во битолската јавност откако во последната недела битолчани интензивно се анкетирани за тоа што мислат за некои познати фаци од градот, кои имаат свои приватни бизниси или се спортски работници. Дел од оние што се политички неинволвирани велат дека се крајно изненадени што нивните имиња се вртат во партиските анкети на власта.

Владејачката партија во Битола се' уште тактизира со изборот кого би го понудила како кандидат за градоначалник на престојните локални избори. Иако првичните изјави беа дека сега им е многу полесно откако СДСМ го избра Менде Диневски во трката за Битола, па знаат со кого ќе си ги мерат силите, сепак, постапките тоа не го потврдуваат. Диневски по се' изгледа не е мал залак, па ВМРО-ДПМНЕ во Битола се' уште го испитува пулсот на граѓаните за тоа кој е најпопуларен нивен член за можен кандидат за градоначалник. Но, во исто време го мери рејтингот и на непартиски луѓе, барем во јавноста неизвалкани со партиски бои. Така, на листата од 13 лица, на која на почеток стојат имињата на актуелниот градоначалник Владимир Талески, на локалниот лидер Зоран Илиевски, заменик-министерот за земјоделство Зоран Коњановски, министерот за информатичко општество Иво Ивановски, актуелните и бивши пратеници Лилјана Кузмановска, Михајло Џолонга и Николче Котевски, се мери популарноста и на неколкумина чаршиски луѓе . Тука се имињата на Игор Божиновски, познат по брендот „Божиновски“ - златарница и часовници, исто така и претседател на Аеро-клубот во Битола, потоа познатиот угостител и слаткар Гоце Талевски познат како „ГТ“, тука е името и на Васко Крајчевски, приватен бизнисмен. На анкетниот лист стои името и на Александар Стефановски, компјутерски инженер, на Васко Драмбевски од женскиот кошаркарски клуб „Пелистер“ и, секако, Јорго Огненовски, познат меѓу битолчани како глумец на акциони филмови во Америка и сопственик на продукциска куќа, како и Светлана Петковска, сопругата на познатиот битолски новинар Менде Петковски, која доаѓа од граѓанскиот сектор.

Игор Божиновски во телефонски разговор вели дека е крајно изненаден што неговото име стои на анкетите за мерење на рејтингот на политичарите од власта. Што е уште посимптоматично, никој не го прашал за тоа досега.

„Никој ниту ме консултирал , ниту ме прашал дали моето име може да стои во такви анкети. Јас разбрав од некои мои пријатели, кои ми се јавија по телефон да ме прашаат дали е вистина дека имам такви амбиции. Јас не сум политички обоен, ниту, пак, имам желба да станам градоначалник“, вели категорично Божиновски.

Анкетата изненади многумина кои толкуваат дека владејачката партија дефинитивно веќе не го поддржува Талески, туку дека е подготвена да поддржи непартиски човек и така да ја задржи власта во градот под Пелистер.

Оттаму се отвораат прашањата дали со одлуката да се стави непартиски човек за градоначалник, централата во Скопје ќе ги надмине внатрепартиските поделби во комитетот во Битола? Дали на овој начин полесно ќе се избегнат критиките за работата на досегашната локална власт? Дали на овој начин би се поттикнале независните листи со што, пак, би се разводниле гласовите на гласачите?

Сепак, одговорот на прашањето дали ВМРО-ДПМНЕ ќе излезе на престојните избори со непартиска личност, го дава првиот човек на битолскиот комитет Зоран Илиоски, кој за добар дел од јавноста важи за еден од фаворитите на партијата за кандидат за градоначалник на Битола.

„Ова се должи на отвореноста на партијата кон граѓаните и не значи ништо конкретно. Оваа анкета ја прави централата во Скопје и ние како партија гледаме да најдеме квалитетно решение за кандидат за градоначалник“, вели Илиоски.

Според него, сите личности што се на анкетата биле консултирани од централата на партијата во Скопје. (А.Б.)