Лејкерси до победа против Клиперси во последната секунда

„Езерџиите“ славеа со 87:86 со кошот на Дерек Фишер

Градското дерби во Лос Анџелес му припадна на Лејкерси кои ги совладаа Клиперси со 87:86 со шутот на Дерек Фишер со звукот на сирената. Коби Брајант постигна 24 коша за Лејкерси, а Ерик Гордон исто толку за Клиперси.

Сан Антонио го дочека Голден стејт и го совлада со 111:94 за своја 18. победа во 21. меч во сезоната, со што го запиша најдобриот старт во историјата на клубот. Што се однесува до самиот натпревар, победата беше очекувана затоа што Голден стејт е сакан гостин за Спарси. Имено, оваа победа е вкупно 25. едноподруго домашен успех на Сан Антонио што е и најдолга активна низа во НБА-лигата на еден тим против ист противник. Воедно, ова беше и 9. победа во низа на Спарси против Голден стејт, а најзаслужен за тоа беше Тони Паркер со 19 поени и девет асистенции. Покрај поразот, гостите останаа и без Стивен Кери кој поради повреда на глуждот во втората четвртина го заврши мечот.

До осма победа во серија стигна и Бостон по победата над Денвер со 105:89 чиј тренер Џорџ Карл и натаму останува на 999 победи во кариерата. Јубилејната ќе има можност да ја оствари денес кога му гостува Торонто.

Во одлична серија се Мајами и Њујорк кои врзаа по шест победи во серија. Првите славеа на тешкото гостување кај Јута со 111:98 реванширајќи се за поразот во продолжение од 116:114 пред еден месец. Во тој меч Јута се врати по минус 22, а сега паднаа во четвртата четвртина која Мајами, предводен од 33 поени, седум скока и девет асистенции на Леброн Џејмс, ја доби со 34:20.

Двобојот на центрите во „Медисон сквер гарден“ го доби Андреа Барњани, но неговиот Торонто беше поразен со 113:100 од домаќинот Њујорк. Италијанецот натпреварот го заврши со рекорд на кариерата од 41 кош (плус седум скока и шест асистенции) играјќи „симултанка“ со Амар Стадемаер - 34 поени и 14 фатени топки. Тројка за победа на 2,7 секунди пред крајот погоди Рајмонд Фелтон (28 поени, 11 асистенции), а топката влезе во кошот откако пет пати го допираше обрачот. Нешто пред тоа Барњани погоди тројка за израмнување на 110:110, а во преостанатото време очајнички од десет метри дебело промаши за продолжување.

Резултати: Бостон - Денвер 105:89, Кливленд - Чикаго 83:88, Њујорк - Торонто 113:110, Милвоки - Индијана 97:95, Њу Орлеанс - Детроит 93:74, Минесота - Оклахома 103:111, Сан Антонио - Голден стејт 111:94, Феникс - Мемфис 98:104, Јута - Мајами 98:111, Сакраменто - Вашингтон 116:91, ЛА Клиперс - ЛА Лејкерс 86:87.