Штефан Едберг пред 25 години го почна својот гренд-слем пат

Големиот шведски тенисер Штефан Едберг пред точно 25 години првпат го крена победничкиот пехар на еден Гренд-слем турнир.

Тогаш 19-годишниот Едберг го освои Австралија опен кој таа година се играше во декември и на тревнати терени, а не како денес на тврда подлога и во јануари. Едберг во финалето прилично убедливо, со 6:4, 6:3 и 6:3, го совлада две години постариот сонародник Матс Виланедер кој претходно два пати славеше на овој турнир.

Всушност, Едберг многу потешка работа имаше во полуфиналето кога го совлада тогаш најдобриот светски тенисер Иван Лендл. За тоа му беа потребни пет сета, а решавачкиот го доби со 9:7. Швеѓанецот на конопи беше и во осминафиналето против домашната надеж Воли Масур од кого ги загуби првите два сета, но сепак, собра сили да направи пресврт и да победи.

Инаку, Штефан Едберг беше еден од главните промотори на играта сервис-волеј, а само две години пред триумфот во Австралија ја најави големата кариера, освојувајќи ги сите четири Гренд-слема во јуниорска категорија, со што стана првиот тенисер кому тоа му појде од рака.

До крајот на својата успешна кариера шведскиот тенисер, според кого денеска наградата за однесување на теренот го носи неговото име, освои шест сениорски Гренд-слем наслови - по два Австралија опен, Вимблдон и УС-опен. Како и на многу други тениски великани трн во окото му остана Ролан Гарос каде во 1989 година го загуби единственото финале против тогаш 17-годишниот Американец Мајкл Ченг.

Во својата кариера Штефан Едберг освои 42 турнири, последен во Доха во 1995 година. На првото место на АТП-листата мина 72 недели.