Ништо од сонот, навивачкиот Јунајтед испадна од Ф.А купот

Фудбалскиот клуб Јунајтед оф Манчестер, формиран во 2005 година од навивачите кои без незадоволни од продажбата на клубот на Американецот Малколм Глејзер, испадна од Ф.А купот од Брајтон (0:4). Тоа значи дека нема да може да му се исполни сонот и на „Олд трафорд“ да заигра со Манчестер јунајтед. Барем не оваа сезона.

„Малиот Манчестер“ кој за четири години преброди три ранга од натпреварувањата, како седмолигаш тргна во остварување на своите надежи. Екипата составена од аматери, сметајќи ги тука и шоферите и службениците чија најголема плата е 100 фунти неделно, застана на последната препрека. Бидејќи, наредната ждрепка можеше да им го донесе Алекс Фергусон и неговите фудбалери. А, само седум минути го делеа од тоа. Имено, во првиот меч со Брајтон водеа со 1:0, но со играч помалку потклекнаа на крајот. Во повторениот завчерашен меч доживеаја дебакл.

Играчите на Реал не го сакаат Роналдо за капитен

Во Реал се случува раскол меѓу фудбалерите на Мурињо. Искрата која го запали огнот е планот на претседателот Флорентино Перез да ја даде капитенската лента на Роналдо. Играчката генијалност на Роналдо не е спорна. Но, неговото однесување на теренот и надвор од него е друга работа. Затоа сите го изолираа, пишува каталонскиот „Спорт“. Роналдо се дружи само со Португалците Пепе и Карваљо. Постарите играчи предводени од Касиљес, Рамос, Алонсо и Арбелоа сметаат дека Роналдо не заслужува да биде капитен. Останува да видиме што ќе направи Мурињо. Ќе го послуша ли претседателот и ќе предизвика бунт во соблекувалната или сето тоа ќе го реши на свој начин.