Лион и Баерн за превласт во групата Ф
Французите ќе бидат ослабени поради неиграњето на Жунињо и Крис, а Бензема поради повреда е неизвесен
Вечерашните дуели од групите Е, Ф, Г и Х од Лигата на шампионите немаат натпреварувачко значење. Уште од поодамна се познати патниците во втората фаза - Јунајтед, Вилјареал, Лион, Баерн, Арсенал, Порто, Јувентус и Реал Мадрид. Но тоа не значи дека некој од нив лефтерно ќе влезе во последното коло. Победа и 500.000 евра е доволен мотив за тоа.
Веројатно најитересен дуел ќе биде оној меѓу Лион и Баерн за супремација во групата Ф. И двата тима имаат по 11 бода, но на Лион му одговара и нерешен резултат без голови за да остане прв. Секој друг епилог ќе значи прво место за Баварците.
Лион ќе биде драстично ослабен, бидејќи Жунињо и Крис заработија жолти картони на гостувањето кај Фиорентина (победа од 2:1) и се суспендирани за овој меч. Покрај тоа неизвесен е настапот и на најдобриот напаѓач Карим Бензема поради мала повреда на мускулот. Дали ќе ризикува Клод Пуел останува да се види.
Такви проблеми нема Јирген Клинсман, кој во составот го има и Алтинтоп. Турчинот се врати на терен на мечот со Хофенхајм во петокот, по четири месеци рехабилитација од скршеницата на стапалото. Како и на тој натпревар се очекува Алтинтоп да стартува од клупата, а мечот да го почнат Лука Тони и Мирослав Клосе.
Како и да е, Лион во домашниот шампионат е во криза, а во последното коло загуби од Нант во гости со 1:2.
„Еден бод од три меча е навистина лош резултат, но може само да се обвинуваме себе си и никој друг. Но, Лигата на шампиони е различна приказна. Време е за нас да ја завртиме страницата“, изјави играчот од средниот ред на Лион, Џереми Тулалан.
Во групата Е Манчестер Јунајтед против Алборг продолжува да го брка израмнувањето на рекордот од 19 меча без пораз во Лигата на шампионите, кој сега е во рацете на Ајакс и Баерн. Последниот пораз на „бебињата“ беше од Милан 0:3 во полуфиналето во 2007 година. Англичаните немаат пораз во последните 17 меча на европската сцена, а имаат примено само еден гол во последните осум меча на свој терен во ЛШ.
Група Е
Манчестер јунајтед - Алборг, Селтик - Вилјареал
Табела:Манчестер јунајтед 9, Вилјареал 9, Алборг 5, Селтик 2
Група Ф
Стеауа - ��иорентина, Лион - Баерн
Табела: Лион 11, Баерн 11, Фиорентина 3, Стеауа 1
Група Г
Порто - Арсенал, Динамо Киев - Фенербахче
Табела: Арсенал 11, Порто 9, Динамо Киев 5, Фенербахче 2
Група Х
Јувентус - Бате Борисов, Реал Мадрид - Зенит
Табела: Јувентус 11, Реал Мадрид 9, Зенит 5, Бате 2 |
