Претходен број

Вардар повторно без стопан 

По шест месеци спонзорство, семејството Костовски се повлекува од клубот и од македонскиот спорт воопшто

Сашко Ѓ. Димовски

Кометал и семејството Костовски излегуваат од Вардар. Ова е дефинитивен став на спонзорот на црвено-црните по вчерашниот состанок на највисокото клупско раководство во Скопје и по нападот на „комитите“ на автобусот со фудбалери на превојот Стража. Ова ни го потврди потпретседателот Коста Костовски кој и самиот е разочаран од последните случувања во и околу клубот.

„Ставот на претседателот Трифун Костовски е дефинитивен. Ние, како семејство и спонзор, се повлекуваме од Вардар“, ни' изјави Коста Костовски.

Тој е изненаден од потегот на вардаровите навивачи во неделата. Не знае и не сака да прејудицира кој е нарачател на немилиот настан, но и тој смета дека случајот има позадина.

„Ниту јас ниту било кој во управата на Вардар не сакаше да дојде до ова, но, за жал, дојде. Како управата, спонзор и пред се' како луѓе згрозени сме од инцидентот“, дополни Костовски.

Претседателот Трифун Костовски уште во неделата најави дека ќе се повлече од Вардар. И не само од Вардар туку и од македонскиот спорт воопшто. Исто така најави дека тука некаде запира и неговото појавување на трибините во спортските сали и на стадионите во Македонија. Во интервју за ТВ Алфа, во понеделникот, Трифун Костовски го потврди својот став за напуштање на најтрофејниот македонски фудбалски колектив, но ја остави отворена опцијата Коста Костовски да го замени во црвено-црната претседателска фотелја. За таквата опција побаравме мислење од Коста Костовски кој кусо прокоментира:

„Јас без Трифун Костовски не одам никаде. Ако ја немам неговата поддршка нема зошто јас да останам во клубот. Сите долгови што се направени во Вардар во времето додека „Кометал“ беше спонзор на тимот ќе ги надмириме. Сакаме да го оставиме клубот со чиста сметка по нашето повлекување“.

Кометал беше спонзор во Вардар во изминатите шест месеци. Помпезно се најавуваа засилувања, работа на долги патеки, стабилизирање на клубот, атак на двојна круна, нова опрема, излез на меѓународна сцена, враќање на стариот клупски сјај. Со новиот спонзор црвено-црните ги имаа сите неопходни услови за реализацијата на најавеното, но испадна дека навивачите го избркаа спонзорот од клубот. Вардар западна во длабока резултатска и играчка криза. Осум првенствени кола нема победа (два пораза и шест реми исходи), а ако кон нив се додадат и двата во осминафиналето во Купот кога беа елиминирани од Ренова, тогаш се стигнува до бројката од 10 натпревари во кои ја немаат почувствувано сласта на победата. Клубот моментно се наоѓа на петтата позиција на табелата во домашното првенство со 24 бода, 10 помалку од лидерот Македонија Ѓорче Петров. Со доаѓањето во Вардар раководството на клубот го ангажираше Ратко Достаниќ за тренер на екипата. Србинот издржа кратко на клупата на Градски. Си замина од политички причини кога Македонија донесе одлука за признавање на Косово. На негово место дојде Жикица Тасевски, кој го одведе Маџаро до финалето во Купот и беше асистент во стручните штабови на Ѓоре Јовановски и Драгољуб Беквалац во Работнички и на Достаниќ во Вардар. По елиминацијата во националниот куп управата на Вардар разреши Тасевски од позицијата прв тренер во клубот и на негово место го доведе Милко Ѓуровски.

И Милко Ѓуровски си оди од Вардар

Клупското раководство на Вардар вчера одржа состанок со фудбалерите на кои им ја соопшти одлуката за повлекување на спонзорот Кометал од клубот. На таквата вест прв реагираше тренерот Милко Ѓуровски кој веднаш најави дека мечот со Македонија Ѓорче Петров во недела на Градски ќе биде последен за него на вардаровата клупа. Човекот си заминува, а за иднината на играчите дополнително ќе се разговара. Дел од нив, разочарани по последните настани, за денеска најавија прес конференција. Каква ќе биде нивната судбина не се знае.
Вардаровите фудбалери се' уште се вознемирени и под стрес од неделниот инцидент на Стража кога дел од навивачката група „Комити“ го каменуваше клупскиот автобус, кој се врати демолиран во Скопје, и се обиде физички да се пресмета со нив. Тие се исплашени за својата безбедноста, а дознаваме дека дел од нив размислувале дали воопшто да истрчаат во недела на Градски во пресметката со лидерот во шампионатот, екипата на Македонија Ѓ.П. Од клубот побарале мечот да се одложи, но не им било дозволено, па затоа раководството на Вардар им сугерирало до играчите да соберат сили и да ја одработат и последната есенска обврска кон клубот по што ќе следат разговори за нивната иднина.

И да излезат на терен, во што веруваме дека сепак ќе се случи, прашање е колку вардарци ќе бидат во состојба да го дадат максимумот по хоророт што го преживеаја во неделата на Стража.