Мечот со Шпанија во Скопје во 22 ч.

По усмената потврда, вчера во просториите на Фудбалската федерација на Македонија (ФФМ) стигна и писмена потврда од Фудбалската асоцијација на Шпанија за гостувањето на европскиот шампион на 12 август во Скопје. „Црвената фурија“ истовремено потврди и дека доаѓа во полн состав.

На барање на Шпанците, првенствено поради телевизискиот пренос за нивната земја, пријателскиот натпревар во Скопје ќе започне во 22 часот, но не е исклучена можноста стартот на мечот да биде нешто порано.

Во меѓувреме, градежното претпријатие „Бетон“ даде гаранции дека Северната трибина на Националната арена „Филип Втори“ ќе биде готова до 2 август, за кога е предвидено свеченото примопредавање. Официјалното пуштање во употреба на Северната трибина ќе биде токму за дуелот со најдобрата репрезентација на Европското фудбалско првенство што се одржа минатата година во Австрија и во Швајцарија. (С.Д.)