Тау Керамика нов кошаркарски шампион на Шпанија
Тау Керамика е новиот кошаркарски шампион на Шпанија. Тимот од Виторија во финалната серија на плејофот на АЦБ-лигата ја декласира Барселона со вкупен резултат од 3:0 за втора титула во богатата историја на овој клуб. Првата ја освои во сезоната 2001/02, кога на тренерската функција се наоѓаше Црногорецот Душко Ивановиќ. Лавовскиот дел од работата во финалето победничкиот тим го направи со тоа што успеа да ги добие првите два меча на гостински паркет, а точка на нерамноправната битка беше ставена кога Тау Керамика на домашен паркет славеше со убедливи 76:61. За МВП на финалето е прогласен Пит Микел, кој прокнижи 14 поени и девет скока, Мирза Телетовиќ застана на 12, а Тијаго Сплитер на 11 кошеви. Во Барса најдобар беше Фран Васкез со 12 поени и шест украдени топки. |
