„Борис Трајковски“ ги мотивира ракометарите
Роберт Димитриевски
Среќниот крај на неизвесноста во врска со салата во која машката ракометна репрезентација на Македонија в недела ќе го пречека Исланд во рамките на баражот за Светското првенство 2009 во Хрватска го зголеми оптимизмот во македонскиот табор. Ракометарите не го кријат задоволството дека токму тие ќе бидат првиот спортски колектив од Македонија што ќе ја има честа да го сефтоса најрепрезентативниот објект во државава. „Борис Трајковски“ со својот капацитет од 6.000 места за седење им е дополнителна мотивација пред огромното искушение што ги очекува в недела навечер.
„Имавме голема желба да играме во новата сала, зашто сметам дека во неа шансите за успех против Исланд ни се поголеми. Очекувам таа да биде исполнета до последното место и шест илјади грла да не' бодрат во обидот по десет години да се вратиме на големите натпреварувања“, вели капитенот Кирил Лазаров.
Најдобриот македонски ракометар и неговите соиграчи вчера ја анализираа касетата од натпреварот на Исланд со домаќинот Полска, од кого загуби со 34:28 на квалификацискиот турнир во Вроцлав минатиот викенд. Но, благодарејќи на победата над директниот конкурент Шведска од 29:25, Исланѓаните изборија второ учество на олимпијадите по тоа пред четири години во Атина.
Од виденото, но и од досегашните сознанија, вклучувајќи ги и меѓусебните дуели во баражите, јасно е дека се' се врти околу ветеранот Олафур Стефансон. Десниот бек на новиот европски првак Сиудад Реал постигна 15 гола на турнирот, а со шест погодока беше најефикасен во победата над Шведска. Стефансон го подели првото место со Лазаров на листата на стрелците во Лигата на шампионите, и тоа откако во реваншот од финалето во Кил постигна дури 12 гола!
На селекторот Иле Темелковски му создаде главоболка настинката на Александар Јовиќ. На негово место на деснокрилната позиција на синоќешниот тренинг требаше да се појави јуниорскиот репрезентативец на Металург, Гоце Георгиевски. |
